चेक अनादर आरोपमा एमाले नेता किशोरविक्रम पक्राउ

१ माघ, काठमाडौं । चेक अनादर गरेको आरोपमा नेकपा एमालेका केन्द्रीय सदस्य किशोरविक्रम मल्ल पक्राउ परेका छन् । उनलाई काठमाडौंबाट पक्राउ गरिएको प्रहरीले जनाएको छ । चेक अनादर सम्बन्धी कसुरमा जाहेरी परेपछि उनलाई नियन्त्रणमा लिइएको जिल्ला प्रहरी परिसर काठमाडौंले जनाएको छ । 

बैंकिङ कसुरको आरोपमा मल्ललाई पक्राउ गरिएको काठमाडौँ जिल्ला प्रहरी परिसरका प्रवक्ता नवराज अधिकारीले बताए। सोमबार पक्राउ परेका मल्ललाई महाराजगन्ज वृत्तमा राखिएको छ। उनीविरुद्ध एक जना पीडितले २० लाख ५० हजार रुपैयाँको बैंकिङ कसुरमा जाहेरी दिएका थिए। जाहेरीपछि अदालतबाट पक्राउ अनुमति लिएर प्रहरीले उनीमाथि कारबाही अगाडि बढाएको हो।

प्रहरीका अनुसार, २० लाख ५० हजार रुपैयाँ बराबरको चेक बाउन्स भएपछि प्रहरीसम्म उजुरी परेको थियो । युवा संघकै एक जना नेतासँग लेनदेनको विषयलाई लिएर जाहेरी परेकाले अनुसन्धानका क्रममा उनलाई पक्राउ गरिएको प्रहरीले जनाएको छ । दुवै पक्षलाई राखेर मिलापत्र गराउने प्रयास भइरहेको प्रहरीले जनाएको छ ।