उपेन्द्र यादवको जसपा मधेश केन्द्रित दलको बैठकमा सहभागी भएन, मोर्चामा बस्न अनिच्छुक

१ माघ, काठमाडौं । धुम्बाराहीमा जारी मधेश केन्द्रित दलहरूको बैठकमा उपेन्द्र यादव नेतृत्वको जनता समाजवादी नेपाल सहभागी भएको छैन् । उपेन्द्र यादव नै बैठकमा आउने कुरा भएपनि उनको दलबाट कोही सहभागी भएका छैनन् । बैठक सुरु हुनअघि मकर सङ्क्रान्तिको विशेष परिकार खुवाइएको थियो । 

मधेश केन्द्रीत मोर्चा गठन गर्ने प्रयास स्वरुप कार्यदलको पहिलो बैठक आज बोलाइएको थियो । बैठकमा मोर्चा निर्माणको खाका, उद्देश्य, र साझा एजेन्डाबारे छलफल गर्ने कार्यक्रा छ । बैठकमा जसपा, लोसपा, जनमत, जनप्रगतिशील, राष्ट्रिय मुक्ति मोर्चा, लमलोपा लगायतका दलका नेताहरु सहभागी छन् । नेताहरु हृदयश त्रिपाठी, रेणु यादव, शरद यादव, डा.शिवजी यादव, केशव झा लगायतका नेता उपस्थित छन् । बैठकमा स्वतन्त्र सांसद अमेरशकुमार सिंह पनि सहभागी छन् ।

सत्ता गठबन्धनका दुई दल नेपाली कांग्रेस र नेकपा एमालेले संविधान संशोधन गरेर थ्रेसहोल्ड बढाउने, समानुपातिक निर्वाचन प्रणाली हटाउने जस्ता प्रावधान ल्याउन लागेको आशांमा मधेस केन्द्रित दलहरू एकीकृत हुन लागेका हुन् । मोर्चा गठनको गृहकार्यमा उपेन्द्र नेतृत्वको पार्टीबाट भने कोही पनि सहभागी छैनन् । जसपा नेपालले उपाध्यक्ष राजकिशोर यादवको संयोजकत्वमा वार्ता समिति गठन भएको थियो ।