सञ्चालक निर्विरोध चयन गर्दै सकियो गरिमा विकास बैंकको साधारणसभा, अध्यक्षमा खाँड अन्य सञ्चालकमा को को ?

१ माघ, काठमाडौं । गरिमा विकास बैंक लिमिटेडको अठारौं वार्षिक साधारणसभाले ६ जना सञ्चालक निर्विरोध चयन गर्दै सकिएको छ ।  आगत पुस २९ गते शुक्रबार कास्की जिल्लाको पोखरा महानगरपालिकास्थित होटल पोखरा ग्राण्डमा सफलतापूर्वक सम्पन्न भएको उक्त साधारण सभाले विभिन्न प्रस्तावहरू पनि सर्वसम्मत रुपले पारित गरेकोछ । 

विकास बैंकले आ.व. २०८०/८१ को वार्षिक प्रतिवेदनसहित शेयरधनीहरुलाई वितरण प्रस्ताव गरेको ५% (कर सहित) को नगद लाभांश सर्वसम्मत पारित गरेको छ । त्यसैगरी उक्त साधारण सभाबाट आगामी कार्यकालका लागि संस्थापक शेयरधनीहरुको प्रतिनिधित्व गर्ने ३ जना संचालकहरु दीलिपप्रताप खाँड, श्याम प्रसाद बस्याल र दीपेन्द्र श्रेष्ठ साथै सर्वसाधारण शेयरधनीको प्रतिनिधित्व गर्ने ३ जना संचालकहरु विमल पाण्डे, शोभाकान्त ढकाल र आयुष्मा कोइरालालाई सर्वसम्मतिबाट निर्वाचित गर्ने निर्णय गरेको छ । 

साधारणसभा पश्चात् लगतै बसेको संचालकहरुको बैठकले सञ्चालक दीलिपप्रताप खाँडलाई सञ्चालक समितिको अध्यक्ष पदमा सर्वसम्मत मनोनित गर्ने निर्णय गरेको छ । खाँड बैंकका पूर्व अध्यक्ष साथै वालिङ नगरपालिकाका पूर्व मेयर पनि हुन । 

हाल बैंकको चुक्ता पूँजी रु ५ अर्ब ६८ करोड ५ लाख १७ हजार ३ सय २७ रहेको छ । साधारणसभाले पारित गरेको लाभांश २०८१ पौष १७ गते कायम रहेका विकास बैंकका शेयरधनीहरुले नगद लाभांश प्राप्त गर्नेछन् । 
विकास बैंकले हाल देशभर १२३ शाखा कार्यालयहरू, १ एक्स्टेन्सन काउण्टर र ५१ एटीएमका साथै नविनतम डिजिटल बैंकिङमार्फत सरल, सुरक्षित एवं गुणस्तरीय सेवा प्रवाह गर्दै आइरहेको छ ।