रविलाई धरौटीमा छाड्न आदेश गर्ने कास्कीका न्यायाधीश राईविरुद्ध न्याय परिषदमा उजुरी

२ माघ, काठमाडौं । कास्की जिल्ला अदालतका न्यायाधीश नितिज राईविरुद्ध न्याय परिषदमा उजुरी परेको छ । न्याय परिषद सचिवालयका अनुसार उनीविरुद्ध युवराज पौडेल (सफल) ले उजुरी दिएका हुन् । न्यायाधीश राईले राष्ट्रिय स्वतन्त्र पार्टीका संस्थापक सभापति रवि लामिछानेलाई धरौटीमा रिहा गर्ने आदेश दिएका थिए । राईविरुद्ध थप तीन बुँदे ध्यानाकर्षण पत्र दिइएको छ । 

बुधवार न्याय परिषद् सचिवालयमा ध्यानाकर्षण पत्र बुझाएको सफलले जानकारी दिए । उजुरीमा न्यायाधीश नितिजविरुद्ध उठेका विषय र प्रशंग जोडिएको छ । जसमा न्यायाधीश राई न्याय सेवाअन्तर्गतको कर्मचारी रहँदा माओवादी केन्द्र निकट कर्मचारी संगठनमा आबद्ध भएको उल्लेख छ । हाल माओवादी केन्द्रका अध्यक्ष पुष्पकमल दाहाल प्रचण्ड लामिछानेलाई बचाउन लागेकाले उनकै निर्देशनमा न्यायाधीश राईले धरौटीमा छाड्न आदेश दिएको दाबी गरिएको छ । 

उनले न्यायाधीश राई विगतमा वरिष्ठ अधिवक्ता सुशील पन्तको ल फर्ममा प्रशिक्षार्थीका रूपमा काम गरेको भन्दै प्रश्न उठाएका छन् । वरिष्ठ अधिवक्ता पन्त अहिले रास्वपा सभापति लामिछानेको पक्षमा वकालत गरिरहेका छन् । राईकै इजलासमा उनले लामिछानेको प्रतिरक्षा बहस गरेका थिए । 

यसमा न्यायाधीश राईले प्रशिक्षार्थीको नैतिकता नदेखाई स्वार्थ बाझिने हिसाबले इजलासमा सुनुवाइ गर्न बसेको अवस्था रहेछ भन्दै सफलले उजुरीमा उल्लेख गरेका छन् ।  न्यायाधीश राईले आदेशलाई ‘कपीमा आदेश’ भन्दै प्रश्न उठाएका छन् ।  ‘योजनाबद्ध रूपमा प्रतिवादीलाई उन्मुक्ति दिने र सहकारी पीडितलाई अन्याय गर्न लागेको देखिन्छ, उजुरीमा उल्लेख छ ।