आज मध्य र पश्चिमका पहाडी क्षेत्रमा आंशिक बदली हुने सम्भावना !

काठमाडौं । देशको पूर्वी क्षेत्र बाहेक सम्पूर्ण भूभागको मौसम मंगलबार सामान्यतया सफा रहने जल तथा मौसम पूर्वानुमान महाशाखाले जनाएको छ ।

पूर्वी क्षेत्रको मौसम आंशिक बदली हुने सम्भावना रहेको मौसमविदले बताएका छन् । बाँकी क्षेत्रको मौसम सामान्यतया सफा रहे पनि अपराहन्नपछि वा बेलुकातिर मध्य र पश्चिमका पहाडी क्षेत्रमा आंशिक बदली हुने सम्भावना रहेको छ ।

पूर्वका थोरै ठाउँमा मेघगर्जनसहित हल्का वर्षाको सम्भावना रहेको जनाइएको छ । मध्य तथा पश्चिमको पहाडी क्षेत्रका एक–दुई स्थानमा बेलुकातिर मेघ गर्जनसहित क्षणिक वर्षाको सम्भावना पनि रहेको छ ।

तर अधिकांश क्षेत्रको मौसम सफा रहने भएकाले दिनभर घाम लागेर गर्मी बढ्ने देखिएको छ ।