आज पनि मौसम बदली : बेलुकातिर मेघ गर्जनसहित वर्षा सम्भावना !

काठमाडौं । काठमाडौं उपत्यका लगायत देशभर केही भागमा आज मंगलबार पनि मौसम सामान्यदेखि आंशिक बदली हुने जल तथा मौसम पूर्वानुमान महाशाखाले जनाएको छ ।

विभागका अनुसार प्रि मनसुन सुरु भएदेखि लगातार रुपमा सक्रिय मौसम केहीबेर खुलेको जस्तो हुने र पानी पर्ने जारी रहेको छ ।

मध्य र पूर्वका केही स्थानमा तथा पश्चिमका थोरै ठाउँमा मेघ गर्जनसहित वर्षाको सम्भावना रहेको छ । यस्तै हावाहुरी पनि चल्ने मौसमविदले बताएका छन् ।

प्रि मनसुनको समय रहेको र बंगालको खाडीबाट जलवाष्प युक्त वायु सतही रुपमा आइरहेकाले मौसम बदली भएको हो । दिउँसोतिर मौसम खुले पनि फेरि बादल लागेर अपराहन्न तथा बेलुकातिर मेघ गर्जनसहित वर्षा हुने देखिएको हो ।