सातवटै प्रदेशको बजेट आउँदै,अधिकांशले चालु आर्थिक वर्षको बजेट तथा कार्यक्रमलाई नै निरन्तरता

काठमाडौं। सातवटै प्रदेशले आज आगामी आर्थिक वर्षको बजेट प्रस्तुत गर्ने भएका छन्। संघीय सरकारले बजेट ल्याएको १८ औँ दिनमा सातवटै प्रदेशले आफ्नो वार्षिक विकास तथा बजेट प्रस्तुत गर्न लागेका हुन्।

चालु आर्थिक वर्षमा ल्याएको बजेट नै कार्यान्वयन नभएको अवस्थामा प्रदेशहरुले नयाँ बजेटको तयारी गरिरहेका छन्। सातवटा प्रदेशले करिब २ खर्ब ५० अर्ब रुपैयाँको बजेट प्रस्तुत गर्ने तयारी गरेका छन्।

अधिकांश प्रदेशले चालु आर्थिक वर्षको बजेट तथा कार्यक्रमलाई नै निरन्तरता दिएर बजेटको तयारी गरिरहेका छन्। एक सरकारी अधिकारीले धेरैवटा कार्यक्रम चालु वर्षमा उल्लेख भएकाले तिनीहरुको निरन्तरता मै बजेट आउने जानकारी दिए।

कार्यक्रम यथावत राखिए पनि उनीहरुले करको दरमा सामान्य हेरफेर गर्न सक्ने अनुमान गरिएको छ। संविधानको अनुसूची ६ मा प्रदेशको अधिकारको सूची उल्लेख छ। त्यसमा प्रदेशहरुले घरजग्गा रजिष्ट्रेसन, सवारी साधन, मनोरञ्जन, विज्ञापन, पर्यटन, कृषि आय, सेवा शुल्क र दण्ड जरिवाना लगाउन सक्नेछन्।