कर्णाली नदीमा जीप खस्दा गाउँपालिका उपाध्यक्ष सहित १० जना वेपत्ता

हुम्ला । खार्पुनाथा गाउँपालिका ५ को खार्पुनाथबाट सदरमुकाम सीमकोट जाँदै गरेको लु १ ज ७१६६ नम्बरको जीप स्थानीय याङ्चु भन्नेस्थानमा दुर्घटना भएर कर्णाली नदीमा खसेको छ ।  यात्रुवाहक जीप कर्णाली नदीमा खसेर जिपमा सवार १० जना बेपत्ता भएका छन् ।

हुम्लाका प्रमुख जिल्ला अधिकारी धोलकराज ढकालले जीपमा १० जना बढी सवार रहेको जानकारी दिँदै गाडी र यात्रुको अवस्था थाहा हुन नसकेको जानकारी दिए । नेपाली सेना, नेपाल प्रहरी, सशस्त्र प्रहरी बल र स्थानीय बासिन्दाको प्रयासमा  अहिले जीप र यात्रुको खोजी भइरहेको प्रमुख जिल्ला अधिकारीले जानकारी दिए ।

दुर्घटनामा खार्पूनाथ गाउँपालिकाको उपाध्यक्ष सिन्धु शाही हमालसहित उनका पारिवारिक सदस्यहरू रहेको खुलेको छ। खार्पूनाथ गाउँपालिकाका अध्यक्ष कर्णबहादुर रावलले दुर्घटनामा उपाध्यक्ष परेको जनाएका छन् ।