वर्तमान सरकार लोकतन्त्र र राष्ट्रियताप्रति दृढसंकल्प छ : प्रधानमन्त्री ओली

काठमाडौं । प्रधानमन्त्री केपी शर्मा ओलीले लोकतन्त्र गणतन्त्र र संघीयता र जनताको शासनकाविरुद्ध अलोकतान्त्रिक शक्तिहरु एकजुट आरोप लगाएका छन् ।

मंगलबार सिंहदरबारमा पत्रकार सम्मेलन गर्दै प्रधानमन्त्री ओलीले लोकतन्त्र गणतन्त्र र संघीयता र जनताको शासनकाविरुद्ध घोर दक्षिणदेखि घोर वामपन्थीसम्म र अति दक्षिणपन्थीदेखि अति वामपन्थीसम्म एकजुट भएको देखिएको आरोप लगाए ।

त्यस्तै प्रधानमन्त्री ओलीले प्रतिनिधिसभामा प्रमुख प्रतिपक्षी दलले असंसदीय र अमर्यादित व्यवहार देखाएको बताए । लोकतान्त्रिक अभ्यास र प्रणालीमा प्रधानमन्त्रीलाई आवश्यक लागेको र राष्ट्रिय महत्वका विषयमा संसद्लाई जानकारी गराउने प्रचलन भएको भन्दै उनले मेरो कुरा नै ठीक भन्ने ‘बालगठ’ प्रस्तुत गर्ने काम प्रमुख प्रतिपक्षीबाट भएकोमा आपत्ति प्रकट गरे ।

प्रधानमन्त्रीको सम्बोधन रोक्नका लागि सदन अवरुद्ध गर्ने, बेलमा नै गएर विरोध गर्ने विषय र सन्दर्भसमेत नभएको उनको भनाइ थियो । कांग्रेसको व्यवहारबाट आफू आश्चर्यचकित भएको उल्लेख गर्दै प्रधानमन्त्रीले हरेक विषयमा निहुँ खोज्ने र विरोध मात्रै गर्ने संस्कारसमेत राम्रो नभएको स्पष्ट पारे ।

गुठी विधेयक गुठी संस्थानको संरक्षणका लागि ल्याइएकोसमेत गर्दै प्रधानमन्त्री ओलीले उल्टो भ्रम छरिएको आरोप लगाए । प्राप्त उपलव्धिको रक्षा गर्नु सवैको दायित्व रहेको भन्दै प्रधानमन्त्री ओलीले वर्तमान सरकार लोकतन्त्र र राष्ट्रियताप्रति दृढसंकल्प रहेको जिकिर गरे ।

प्रधानमन्त्री ओलीले परिवर्तनकारी शक्तिहरु नमिल्दा र प्रतिकृयावादी शक्तिसँग मिलेकाले नै २००७ सात सालपछि संविधान बन्न लामो समय लागेको भन्दै २०१७ को घटना भएको स्मरण गराए । प्रधानमन्त्री ओलीले समृद्धि हासिल गर्न सम्बाद र सहकार्यका लागि सरकार खुला रहेको पनि बताए ।