पश्चिममा ठूलो वर्षा : नदीमा पानीले सतर्कता तह पार गर्यो, सुरक्षित रहन चेतावनी

काठमाडौं । बिहीबारदेखि सक्रिय भएको मनसुनका कारण आइतबार पश्चिम नेपालमा ठूलो वर्षा भइरहेको छ । बाढी पूर्वानुमान महाशाखाले नेपालगञ्ज आसपासमा वर्षाले सतर्कता तह पार गरेको जनाएको छ ।

वर्षा हुने क्रम जारी रहेकोले डुवानको खतरा देखिएको छ ।आपतकालिन कार्यसञ्चालन केन्द्रले सतर्क रहन आग्रह गरेको छ ।

‘हाल दिनको एक बजे नेपालगञ्ज वर्षामापन केन्द्रमा वर्षाले सतर्कता तह पार गरेको छ र वर्षा हुने क्रम जारी छ। चुरेबाट शुरु भइ बाँके जिल्ला भएर बहने डुडुवा, मानखोला, झिंझरी लगायत स–साना सवै खोलानाला आसपास सतर्क रहौँ।

नेपालगञ्ज उमनपाको होचा स्थानहरुमा पनि डुवान हुनसक्छ सतर्क रहौँ’, आपतकालिन कार्यसञ्चालन केन्दले सूचना जारी गरेर भनेको छ ।

यसैबिच, गत असार ०५ गतेदेखि पूर्वी भेगबाट नेपालमा प्रवेश गरेको मनसुन क्रमश मध्य भू-भाग हुँदै पश्चिमतर्फ विस्तार हुने क्रममा आज असार ०८ गते सुदुर पश्चिम सम्मै फैलेको जल तथा मौसम विज्ञान विभाग, जलवायु शाखाले जनाएको छ ।