मापदण्ड विपरित संचालनमा रहेको स्वास्थ्य केन्द्र बन्द

काठमाडौं । सिन्धुपाल्चोकको हेलम्बु गाउँपालिकाले मापदण्ड विपरीत सञ्चालनमा आएका स्वास्थ्य केन्द्रहरू बन्द गराएको छ।

महाङ्काल स्वास्थ्य सेवा समिति र मंगल स्वास्थ्य केन्द्रलाई बन्द गरिएको छ । विगत १५ वर्षदेखि संचालित ति स्वास्थचौकीहरु गाउँपालिकाले बन्द गराएको हो ।

सरकारले तोकिएको कानुन मिचेर सञ्चालित भएका स्वास्थ्य केन्द्र बन्द गराएको गाउँपालिकाले जनाएको छ। मानव स्वास्थ्यमाथि खेलवाड नहाेस् भन्ने हेतुले गाउँपालिकाले साे कदम चालेकाे हाे ।

सरकारले तोकिदिएको मापदण्ड पुर्याउन नसकेका कारण स्वास्थ्य केन्द्र बन्द भएको गाउँपालिकाका स्वास्थ्यकर्मी ज्ञानेन्द्र सिग्देलले नेपाल बहस डटकमलाई बताए।

आफूखुसी सेवा सञ्चालन गरेको पाइएपछि हामीले कागजात पुर्याउन भनेका थियौँ । तर, हाम्रो अनुरोध र बारम्बारको जानकारीलाई वेवास्था गरेपछि बाध्य भएर बन्द गर्नुपर्ने अवस्था आएको सिग्देलले बताए ।

गत साउनदेखि सञ्चालनमा आएको कन्यामारिया हेल्थ एण्ड एजुकेसन सेन्टर, हेलम्बु–४  पनि स्थानीय तहसँग समन्वय नगरेका कारण स्थगित गरिएको सिग्देलले जानकारी दिए । उनीहरूलाई मापदण्ड पुर्याएर सञ्चालनमा ल्याउन गाउँपालिकाले पटक–पटक अनुरोध गरेको थियो।

सरकारको रणनीति अनुसार हेलम्बु गाउँपालिकाले एउटा वार्डमा एउटा स्वास्थ्य संस्थाको पहुँच पुर्याएको स्वास्थ्यकर्मी सिग्देलले जानकारी दिए ।