कुकुरको दिसाबाट यस्ता रोग फैलिन सक्छन् !

९ भदौ, काठमाडौं । के तपाईले घरमा कुकुर पाल्नु भएको छ ? यदि नपालेको भए पनि प्राय सबैले घरमा पालिएका कुकुरलाई हिँडाउँदै सार्वजनिक स्थलमा दिशा पिसावगराउने गरिएको त देख्नु भएको होला ।

अब जथाभावी कुकुरलाई दिशा पिसाव गराए काठमाडौं महानगरपालिकाले कारबाही गर्ने घोषणा गरेको छ। महानगरपालिकाका प्रवक्ता ईश्वरमान डंगोलका अनुसार जथाभावी त्यसरी कुकुरलाई सार्वजनिक सडक तथा गल्लीमा दिसापिसाब गराउँदा एक त फोहर हुन्छ अर्को त्यसले हानिकारक रोग पनि निम्त्याउँने खतरा बढेको छ ।

 महानगरपालिकाले थालेको यो अभियानमा सुरुमा महानगरपालिकाका विभिन्न वडामा रहेका टोल सुधार समिति तथा क्लबहरूलाई परिचालन गरेर चेतना जगाउने प्रयास गर्ने बताएको छ। तर यदि त्यसो गर्दा पनि कुकुरधनीहरू सचेत नभए जरिबाना, कुकुर जफत तथा अन्य कारबाही गर्नेछौँ, डंगोलले बताए ।

केन्द्रीय पशुचिकित्सालयका प्रमुख तथा वरिष्ठ पशु चिकित्सक डा. बलराम थापाका अनुसार कुकुरको मलमूत्रसँग हुन सक्ने लसपसबाट मानिसमा खासगरी परजीवी जुका तथा पाचनप्रणालीमा असर गर्ने जियार्डियासिस, साल्मोनेलिस र अमिबियासिस जस्ता रोग सर्न खतरा रहेको हुन्छ ।

अर्को जोखिमचाहिँ त्यसमा हुन सक्ने ब्याक्टेरियाको सङ्क्रमण पनि हो। त्यसमा पनि सबभन्दा जोखिम चाहिँ लेप्टोस्पाइरोसिसबाट हुन सक्छ। कुकुरको पिसाबबाट यदि खानेपानीको स्रोतमा प्रदूषण हुन पुगेको खण्डमा यसले मानिसलाई गम्भीर असर पुर्‍याउन सक्छ। यसबाट मिर्गौलामा गम्भीर असरका साथै कसैकसैमा मेनिन्जाइटिस पनि गराउन सक्छ, उनले भने।

छाडा छाडिएको कुकुरलाई के गर्ने ?

यता काठमाडौंमा कसैले नपालेको तर समुदायमा रहने कुकुरको सङ्ख्या अत्यधिक छ। महानगरपालिकाका अनुसार यहाँ २६ हजार त्यस्ता भुस्याहा अर्थात् ‘सामुदायिक कुकुर’ छन्। तर तिनको दिसापिसाबको व्यवस्थापनबारे भने स्पष्ट नियम अझै पनि छैन।

तिनको व्यवस्थापनका लागि समुदाय स्वयं र सङ्घसंस्थासँग मिलेर काम गर्ने महानगरको प्रयास छ । त्यस्ता सामुदायिक कुकुरलाई रोगमुक्त गराउने र तिनको सङ्ख्या नियन्त्रण गर्ने अभियान पनि सँगसँगै चलिरहेको छ ।