दशैँको सुरक्षाका लागि देशभरि ४३ हजार प्रहरी परिचालन

१९ असोज काठमाडौं । दशैँ मनाउन आम सर्वसाधारणहरु घर गएसँगै काठमाडौं उपत्यकामा चहलपहल घटेको छ ।सीमित भाडाका र निजी गाडी तथा मोटरसाइकल मात्रै सडकमा गुडेको महानगरीय ट्राफिक प्रहरी महाशाखाले जनाएको छ ।

महाशाखाले दिएको तथ्याङ्कअनुसार शनिबार सबैभन्दा धेरै तीन लाख ४५ हजार मानिस काठमाडौंबाट बाहिरिएका छन् । त्यस्तै ५४ हजार आठ सय गाडी पनि बाहिरिएका छन् ।

प्रहरीका अनुसार शनिबार बिहान ६ बजेदेखि आइतबार बिहान ६ बजे सम्म करिव ४ लाख ३२ हजार ७० यात्रु बाहिरिएको बताएको छ । उस्तै ७९ हजार ८ सय ५ जना यात्रु दशैं मनाउन काठमाडौं भित्रिएका छन् ।

अहिलेसम्म दशैँ मान्नका लागि झण्डै २४ लाख मानिस बाहिरिएका छन् । यस्तै गएको वर्षभन्दा यो वर्ष शान्ति सुरक्षा प्रभावकारी भएको नेपाल प्रहरीका प्रवक्ता एवं प्रहरी नायब महानिरीक्षक डीआईजी विश्वराज पोखरेलले बताएका छन् ।

उनका अनुसार दशैँको अवसरमा शान्ति सुरक्षाका लागि देशभरि आठ हजार पाँच सय स्थानमा ४३ हजार प्रहरी परिचालन गरिएको छ ।

प्रहरीले निगरानी बढाउँदा बढाउँदै पनि गाडीले तोकेकोभन्दा दोब्बर बढीसम्म भाडा असुल्ने गरेको पाइएको भन्दै उनले तीन सय ५० गाडीलाई कारबाही गरिएको बताए । त्यस्तै नागढुंगा कोटेश्वर लगायतका सडकको जाम पनि हटेको प्रहरीले जनाएको छ ।