फेवातालमा जलकुम्भीले गर्दा डुङ्गा ब्यवसायी हैरान !

१९ असोज, पोखरा । पोखरालाई स्वर्गको टुक्रा पनि भनिन्छ । पोखराको मुटुचाहिँ फेवाताल हो । फेवाताल, जसलाई हेरेर जो कोही पनि मोहित हुन्छन् । फेवाताल, जसको दृश्यपान गरेर कसैको धित मर्दैन ।

लमतन्न परेको फेवातालमा छचल्किएको पानीले समुन्द्रको झल्को दिन्छ । यहाँबाट देखिने प्राकृतिक छटाहरु संसारमा प्रायः कमै मात्र देख्न सकिन्छ । फेवाताल, जहाँ कुमारी माछापुच्छ्रे हिमालको छायाँ देख्न सकिन्छ ।

यो दशैँ बिदामा नेपाल बहस डटकमका प्रधान सम्पादक इन्द्र रिजालको स-परिवार पोखरा फेवातालमा पुगेको छ । बिदाको समय सदुपयोग गर्दै घुम्न गएका रिजाल भन्छन्, फेवाताल नवविवाहिता दुलाहारदुलहीका लागि सुहागरात मनाउने राम्रो गन्तव्य हो ।

गर्लफ्रेण्ड र ब्वायफ्रेण्डका लागि डेटिङ्ग स्पट पनि हो । विद्यार्थी र साथीभाइका तथा हामी जस्तै स परिवारसहित सामुहिक घुम्न आउनेहरुका राम्रो गन्तव्य स्थल पनि हो फेवाताल ।

फेवातालसँगै जोडिएको बसुन्धरापार्क र कोमागाने पार्कले फेवाताललाई थप सुन्दरता थपेको छ । ती पार्कहरुमा युवा युवतीहरु आलिंगनमा बाधिँदै फेवातालको दृश्यावलोकन गरेको प्रशस्त देख्न पाइन्छ ।

नेपाल बहस डटकमको डेस्कसंगै कुराकानी गर्दै रिजाल भन्छन्, भक्तजनहरुका लागि धार्मिक स्थल पनि हो फेवाताल । फेवातालको बिचमा रहेको तालवराही मन्दिर प्रसिद्ध धार्मिक स्थलका रुपमा परिचित छ ।

जहाँ दिनहुँ हजारौं भक्तजनहरु पूजा आराधना गर्न आउने गर्दछन् । त्यही मन्दिर परिसरमा बसेर फेवातालको चारैतिर दृश्यावलोकन गर्दै फेवा सुन्दरताको रस्वादन गर्न सकिन्छ ।

उक्त तालवराही मन्दिर दर्शनका लागि डुङ्गा सयर अनिवार्य छ । तालको बीच भागमा रहेकाले डुङ्गामा मात्रै जान सकिने यो मन्दिरमा जाँदा डुङ्गाको मज्जा लिन पाइने छ। तर अहिले फेवातालमा जलकुम्भीले गर्दा डुङ्गा ब्यवसायी हैरान भएका छन् ।