कृष्णबहादुर महराविरुद्ध पक्राउ पुर्जि जारी

१९ असोज, काठमाडौं । बलात्कार प्रयासको आरोप लागेका तत्कालीन सभामुख कृष्णबहादुर महरालाई काठमाडौं जिल्ला अदालतले पक्राउ पुर्जि जारी गरेको छ ।

पीडित भनिएकी महिला रोशनी शाहीले किटानी जाहेरी दिएपछि अदालतका न्यायाधीश ब्रजेश प्याकुरेलले महरालाई पक्राउ पुर्जि जारी गरेको बताए । शुक्रबार राति मात्र महराविरुद्ध किटानी जाहेरी परेका कारण आइतबार प्रहरीले काठमाडौं जिल्ला अदालतमा पक्राउ पूर्जीको लागि फाइल पेश गरेको हो।

पीडित महिलाले प्रहरी वृत्त बानेश्वरमा किटानी जाहेरी दिएकी थिइन् । पीडित महिलाले महराविरुद्ध नयाँ बानेश्वर प्रहरी वृत्तमा शनिबार जबरजस्ती करणी उद्योगमा उजुरी दिएपछि शनिबार नै प्रहरीले महरालाई पक्राउको तयारी गरेपनि अदालतबाट पक्राउ पूर्जी लिनुपर्ने कारणले शनिबार पक्राउ सम्भव नभएको हो।

संसद सचिवालयकै कर्मचारी रहेकी शाहीले गत आइतबार कोठामै आएर महराले आफूलाई बलात्कारको प्रयास गरेको आरोप लगाएपछि त्यसको पर्सीपल्ट महराले सभामुखबाट राजीनामा दिएका थिए।