टिपरको ठक्करबाट युवकको मृत्यु, चालक पक्राउ

२५ पुस जनकपुरधाम । प्राकृतिक सम्पदाको दोहन गरी भारततर्फ निकासी गर्ने तस्करहरुको विरोध गर्ने एक युवकको आज बिहानै टिपरले किचेर हत्या गरिएको छ ।

धनुषास्थित औरही खोलाको गिट्टी बालुवाको अवैध उत्खनन गरी भारततर्फ निकासी गर्ने समूहको विरोधमा उत्रिएका मिथिला नगरपालिका – ५ का युवक दिलिपकुमार महतोको आज टिपरले ठक्कर दिई हत्या गरिएको हो । लामो समयदेखि औरही लगायत यस भेगका खोलाबाट अवैध रुपमा नदीजन्य वस्तुको उत्खनन गरी निकासी हँुदै आएकोमा स्थानीयले विरोध गर्दै आएका छन् ।

इलाका प्रहरी कार्यालय ढल्केबरका प्रहरी निरीक्षक रामकुमार यादवका अनुसार, नदीजन्य बालुवा र गिट्टीको अवैध उत्खनन र निकासी गर्ने व्यावसायीको विरोधमा उत्रेका महतोको आज बिहानै टिपरले किचेर हत्या गरिएको हो । हत्या गर्ने टिपर चालकको नाम नखुलाई पनि टिपरको पहिचान भने स्पष्ट गरिएको छ ।

प्रहरी निरीक्षक यादवले दिएको जानकारी अनुसार, युवक महतोलाई किच्ने टिपर नं. ना ७ ख ६४१३ नम्बर हो । आज बिहान करिव ४ बजे टिपर आएर जथाभावी उत्खनन गर्न थालेपछि मृतक महतो विरोध गर्न खोलामै पुगेर अवरोध सिर्जना गर्न खोजेका थिए ।

घटनामा संलग्न टिपर चालकलाई प्रहरीले पक्राउ गरी आवश्यक अनुसन्धान सुरु गरेको छ । साथै मृतक महतोको शव परीक्षणका लागि जनकपुर अञ्चल अस्पताल पठाइएको जानकारी प्रहरी निरीक्षक यादवले दिए ।

घटनाको विरोधमा आज बिहानैदेखि स्थानीयवासीले पूर्व पश्चिम राजमार्ग अवरुद्धगरेका थिए । तर भर्खरै मृतक परिवारलाई क्षतिपूर्ति दिने विषयमा सहमति भएपछि राजमार्ग खुलाइएको प्रहरी निरिक्षक यादवले जानकारी दिए ।