पूर्वी नवलपरासीको कावासोतीमा चिस्यान केन्द्र बन्दै

मिना कंडेल

५ माघ नवलपुर । पूर्वी नवलपरासीको कावासोतीमा चिस्यान केन्द्र बन्ने भएको छ । कावासोती नगरपालिका वडा नं १४ मा निर्माण हुने सो चिस्यान केन्द्र रु २१ करोडको लागतमा निर्माण हुने भएको छ ।

प्रवासबाट आर्जित सिप ज्ञान र पूँजी स्वदेशका लागि भन्ने मुल नाराका साथ स्थापित रिटर्नी कृषि तथा पशुपालन समूह कम्पनी लिमिटेडले तीन हजार मेट्रिक टनको चिस्यान केन्द्र निर्माण गर्न लागेको अध्यक्ष नेत्रनारायण थनेतले बताउनुभयो । चिस्यान केन्द्र निमार्णको सबै प्रक्रिया पुरा गरी प्रतिनिधिसभा सदस्य तिलक महतले शिलान्यास गरेका हुन् । शिलान्यासको औपचारिक समारोहलाई सम्बोधन गर्दै सांसद महतले दुई वर्ष भित्रमा नवलपुर चिस्यान केन्द्रको निर्माण कार्य सम्पन्न हुने जानकारी दिए ।

संघीय सरकारको कृषि मन्त्रालयले काम सुरु गर्नु भनि एक करोड रकम कावासोती नगरपालीकाको खातामा पठाई सकेको महतले जानकारी समेत दिए । संघीय सरकारको ५० प्रतिशत, गण्डकी प्रदेश सरकारको २० प्रतिशत सहयोग र बाँकी बिदेश गएर फर्केका देशैभरीका युवाहरुको लगानीमा गरी रु २१ करोडको लागतमा चिस्यान केन्द्र निमार्ण हुन लागेको अध्यक्ष थनेतले बताए । यो काठमाण्डौं बाहिर पहिलो पटक ब्यवस्थित प्रबिधियुक्त चिस्यान केन्द्र निर्माण हुन लागेको हो ।

चिस्यान केन्द्रमा मौसममा उत्पादित फलफुल तथा खाद्य बस्तुलाई भण्डारण गरी बेमौसममा बजारमा पठाउने बताईएको छ । यसले गर्दा किसानले पनि उचित मूल्य पाउने र कृषि उपजमा परनिर्भरता समेत घट्ने अध्यक्ष थनेतको भनाई छ ।

यस आयोजना सँग सहकार्य रिटर्नी माईग्रेन्ट नेपालले गरेको छ । चिस्यान केन्द्र सञ्चालन सँगै नवलपुर सहित अन्य जिल्लामा कृषि तथा फलफुलको उत्पादन बढ्ने र बजार समेत बिस्तार हुने कम्पनीले विश्वास लिएको छ ।