टिपरको ठक्करबाट घाइते महिलालाई ब्याक गरेर हत्या

१७ माघ, काठमाडौं । गोरखा नगरपालिका १० छेवेटारमा सञ्‍चालित एक क्रसर उद्योगको परिसरमा टिपरले किच्दा एक महिलाको मृत्यु भएको छ ।

शुक्रबार बिहान दुध बेच्न हिँडेकी ५२ वर्षीया मनमाया तामाङको गोरखकाली क्रसर उद्योगको परिसरमा ग १ ख ८०२७ नम्बरको टिपरले ठक्कर दिँदा ज्यान गएको हो । मनमाया तामाङका आफन्त र छिमेकीले अवैध क्रसर बन्द हुनुपर्ने माग राखेर आन्दोलन गरेपछि गोरखा नगरपालिकास्थित छेवेटार क्षेत्र तनावग्रस्त बनेको छ ।

स्थानीय र आफन्तले पीडित परिवारलाई ५० लाख क्षतिपूर्ति उपलब्ध गराउनुपर्ने र क्रसर उद्योग बन्द गराउनु पर्ने माग राखेका छन् । स्थिति नियन्त्रणमा लिन प्रमुख जिल्ला अधिकारी देवेन्द्र लामिछाने नेतृत्वको टोली र पीडित पक्षबीच छलफल भए पनि बिना निर्ष्कष टुङ्गीएको छ । प्रत्यक्षदर्शीले टिपरको ठक्करबाट घाइते महिलालाई ब्याक गरेर हत्या गरेको दाबी गरेका छन् ।