टिप्पर तीव्र गतिमा हुइँकिँदा प्रविणको मृत्यु

६ फागुन काठमाडौं । टिप्पर तीव्र गतिमा हुइँकिँदा गएराती एक जनाको मृत्यु भएको छ । गएराति शङ्करापुर नगरपालिका ६ को धोला टोलमा टिप्परले ठक्कर दिँदा स्थानीय बासिन्दा ४० वर्षीय प्रविण श्रेष्ठको मृत्यु भएको प्रहरीले जनाएको छ ।

टिप्परको ठक्करबाट घाइते भएका श्रेष्ठको उपचारको क्रममा गए राति नै ज्यान गएको हो । ठक्कर दिने ना १ क ४५६४ नम्बरको टिप्पर चालकलाई पक्राउ गरिएको प्रहरीले जनाएको छ । स्थानीयबासीका अनुसार श्रेष्ठ सुस्तमनस्थितिका थिए र उनी सडक पेटिमा सुतिरहेका थिए ।

दुई हप्ताअघि मात्रै कलङ्कीको अण्डरपासमा टिप्परकै ठक्करबाट दुई जनाको ज्यान गएको थियो । माघ महिनामै तनहुँ, सुर्खेत, कञ्चनपुर र नवलपरासीमा पनि टिप्परले ठक्कर दिँदा मोटरसाइकल चालक र पैदलयात्रुको ज्यान गएको थियो ।

ट्राफिक नियमको उल्लङ्घन गर्दै तीव्र गतिमा चलाएकै कारण टिप्परले ठक्कर दिने र ज्यान लिने क्रम बढेको भन्दै जताततै विरोध हुँदै आएको छ ।