कलंकीमा ट्रकले नौ वटा सवारीलाई ठक्कर दिँदा एकको मृत्यु

१२ फागुन काठमाडौं । काठमाडौंको कलंकीमा ब्रेक फेल भएको एउटा ट्रकले नौ वटा सवारी साधनलाई एकैसाथ ठक्कर दिँदा एकको मृत्यु भएको छ भने ४ जना घाइते भएका छन् ।

सोमबार बेलुका पेट्रोलपम्पमा अगाडिका सवारी साधनमाथि उक्त ट्रकले ठक्कर दिएको कलंकी प्रहरीले जनाएको छ ।नागढुंगाबाट कलंकीतर्फ आउँदै गरेको ट्रकले ब्रेक फेल हुँदा मोटरसाइकल, स्कुटर, कार, ट्याक्सीलगायत नौवटा सवारी साधनलाई एकैपटक ठक्कर दिएको हो।

घटनामा एकको मृत्यु भएको कालीमाटी प्रहरीका डीएसपी रुगम कुँवरले जानकारी दिए। कुँवरका अनुसार ना ६ ख २८७१ नम्बरको उक्त ट्रकले तीनवटा बाइक, एउटा स्कुटर, एउटा हात्तीगाडी, एउटा स्कोर्पियो, एउटा सरकारी गाडी, एउटा ट्याक्सी र एउटा ट्रकमा ठक्कर दिएको थियो।

ट्रकका चालक वीरेन्द्रकुमार शाहलाई प्रहरीले नियन्त्रणमा लिएको छ। घटनामा मृत्यु भएका एकजना कुन सवारीका थिए भन्ने खुलेको छैन।