होली नखेल्न तथा सभा-सम्मेलनमा नजान काठमाडौं प्रशासनको आग्रह

२२ फागुन, काठमाडौं । सर्वसाधारणलाई अत्यावश्यक काम बाहेक सभा, सम्मेलन तथा भोजभतेरमा सहभागिता नजनाउन तथा होली नखेल्न जिल्ला प्रशासन कार्यालय काठमाडौंले आग्रह गरेको छ । छिमेकी राष्ट्र चीनको वुहान प्रान्तबाट फैलिएको कोरोना भाइरस (कोभिड–१९) ले महामारीको रुप लिएपछि नेपाल समेत उच्च जोमिखमा रहेको विश्व स्वास्थ्य संगठनले ठहर गरेको छ ।

सरकारले समेत यसको संक्रमणबाट जोगिन सचेतना अपनाउनुका साथै सभा, सम्मेलन तथा भोजभतेर जस्ता कार्यक्रम नगर्न आग्रह गरेसंगै राष्ट्रिय तथा स्थानीय कार्यक्रमहरु धमाधम रद्ध भईरहेका छन् । आज बिहान जिल्ला प्रशासन कार्यालय काठमाडौंका सुचना अधिकारी मानबहादुर बुढाले एक सुचना जारी गर्दै अर्को निर्णय नभएसम्मका लागि विभिन्न प्रकारका उत्सव, मेला, पर्व होली लगायतका कार्यक्रमको आयोजना नगर्न र त्यस्ता सम्मेलन तथा कार्यक्रमहरुमा सहभागी नहुन समेत सबैमा अनुरोध गरेका हुन् ।

उता चीनको वुहान प्रान्तबाट फैलिएको कोरोना भाइरस (कोभिड–१९) ले गर्दा विश्वसँगै नेपालको अर्थ व्यवस्थामा पनि असर पर्न थालेको छ । कोरोना भाइरसका कारण नेपालको होटल व्यवसायमा समेत प्रतिकुल असर परिरहेको छ । विशेष गरेर चाइना, इरान, जापान लगायतका देशहरुबाट नेपाल घुम्न आउने पर्यटक कोराना भाइरसका कारणले रोकिदा अर्थ व्यवस्थामा पनि ठूलो असर परेको छ ।