काेरोनाका बिरामी अस्पतालको झ्यालबाट हामफालेर फरार

२२ फाल्गुण, काठमाडौं । कोरना भाइरसको संक्रमणको आशंकामा टेकु अस्पतालमा राखिएका एक नेपाली हिजो राती भागेका छन् । दक्षिण कोरियामा रही रोजगारी गरिरहेका ती नेपाली हिजो मात्र स्वदेश फर्केका थिए ।

विमानस्थलमा चेकजाँच गर्दा उनमा संक्रमण भएको आशंका गरिएपछि टेकु अस्पतालमा आइसोलेशनका लागि राखिएको थियो । उनको स्वास्थ्य प्रतिवेदन आउनु अघि नै गएराति अस्पतालको झ्यालबाट फालहानी भागेका हुन् ।

यसबारे महानगरीय प्रहरी परिसरमा खबर भएपछि प्रहरी टोली खोजविनका लागि खटिएको छ । नाम उल्लेख नगरिए पनि उनी सुनसरीको इटहरी निवासी भनिएको छ । प्रहरी स्रोतका अनुसार उनले बोक्दै आएको मोबाइल ट्र्याक गर्दा विराटनगर पुगेको खुलेको छ । उनलाई नियन्त्रणमा लिन जिल्ला प्रहरी कार्यालय मोरङको टोली खटिएको बताइएको छ । यसअघि पनि टेकु अस्पतालबाटै एकजना फरार भएका थिए ।