प्रधानमन्त्रीको स्वास्थ्यमा क्रमिक सुधार, भिडियो कन्फ्रेन्समार्फत सन्देश दिने तयारी

२४ फागुन काठमाडौं । प्रधानमन्त्री केपी शर्मा ओलीको स्वास्थ्य अवस्था दिनप्रति दिन राम्रो हुँदै गइरहेको छ । प्रधानमन्त्री ओलीको मिर्गौला प्रत्यारोपणमा नेतृत्व गरेका प्राध्यापक डाक्टर प्रेम ज्ञवालीका अनुसार प्रधानमन्त्री ओलीको अवस्था राम्रो हुँदै गएकाले अब आइतबार वा सोमबार अस्पतालबाट डिस्चार्ज गरिने तयारी भइरहेको छ ।

डाक्टर ज्ञवालीले प्रधानमन्त्री ओली बालुवाटार जानेबित्तिकै भेटघाट धेरै हुने भएकाले संक्रमणको जोखिम बढ्ने हुँदा अस्पताल मै अझै केही दिन राख्ने कि घर पठाउने भन्नेबारेमा अस्पतालमा छलफल गरेर जानकारी गराउने बताए ।

गएको बुधबार त्रिवि शिक्षण अस्पतालमा मिर्गौला प्रत्यारोपण गरिएका प्रधानमन्त्री ओलीको अहिले अस्पतालको विशेष कक्षमा राखिएको छ । प्रधानमन्त्रीको स्वास्थ्यमा क्रमिक सुधार हुँदै गएकाले उनले छिट्टै भिडियो कन्फ्रेन्समार्फत सन्देश दिने तयारी गरेको पनि अस्पतालले जनाएको छ ।

यस्तै प्रधानमन्त्री ओलीलाई मिर्गौला दिएकी समिक्षा संग्रौलाको स्वास्थ्य अवस्था पनि सामान्य हुँदै गएको छ । उनलाई पनि आइतबार वा सोमबार घर पठाउने डाक्टर ज्ञवालीले जानकारी दिए ।