के लसुन र तातोपानीले कोरोना भाइरस रोकथाम होला र ?

२७ फागुन काठमाडौं । लसुन प्याज प्रजातिको मसला हो । यसको नजिकका अरू प्रजातिहरू प्याज, छ्यापी आदि हुन् । परापूर्वकालदेखि नै लसुन पकवान र औषधिको रूपमा प्रयोग हुदै आएको छ । लसुनका पोटीहरू मिलेर बनेको दाना तथा पातसमेत प्रयोग हुन्छ । एक पोटी मात्र फाल्ने लसुनबाहेक अरु लसुनका दानामा धेरै पोटीहरू हुन्छन ।

पोटीहरू काँचो वा पकाएर खाइन्छ वा औषधिको रूपमा प्रयोग गरिन्छ । यसको स्वाद पर्पर्याउने हुन्छ तर जब पकाइन्छ यो केही गुलियो र स्वादिलो हुँदै जान्छ । लसुनमा एन्टिअक्सिडेन्ट पाईने हुनाले यो निकै लाभदायक छ । पछिल्लो समय चीनको वुहान शहरबाट सुरु भएको कोरोना भाइरसको संक्रमण विश्वभरि फैलिएपछि भाइरसबाट बच्न लसुन निकै लाभदायिक हुने विज्ञहरुले बताएका छन् ।

चीन हुँदै संसारभर फैलिएको कोरोना भाइरसको सङ्क्रमण रोक्न लसुन खान केही विज्ञले सुझाव दिएपछि उक्त समाचार सामाजिक सञ्जालमा भाइरल भएको बीबीसीले उल्लेख गरेको छ । तर विश्व स्वास्थ्य सङ्गठनको भनाईमा लसुनले स्वास्थ्यलाई राम्रो गर्छ र त्यसमा केही सूक्ष्मजीव मार्ने गुण पनि हुन्छ । तर त्यसको प्रयोगले मात्र कोरोना भाइरसको सङ्क्रमण न्यून हुन्छ भन्ने कुनै प्रमाण नभएको जनाइएको छ ।

त्यसो त तपाई प्रामाणिक चिकित्सकीय विधि पनि अवलम्बन गरिरहनुभएको छ भने धेरै परिस्थितिमा यस्ता औषधि हानिकारक नहुन सक्छन । तर तिनले हानी गर्ने सम्भावना पनि हुन्छ । सामान्यतया तरकारी र फलफूल खानु तथा पानी सेवन गर्नु स्वास्थ्यका लागि राम्रो भएको हामीलाई थाहा भएकै कुरा हो । तर निश्चित भाइरससँग सङ्घर्ष गर्न निश्चित खानेकुराले सहयोग गर्छ भन्ने प्रमाण अहिलेसम्म कही कतै भेटिदैन ।

धेरैजसो भाइरसको सङ्क्रमण रोक्ने एउटा मुख्यविधिमा हात स्वच्छ राख्न दलिने ’स्यानिटाईजर जेल’ पनि पर्छ । तर धेरै ठाउँमा स्यानिटाईजरको अभाव भएको छ । तर त्यस्ता विधिबाट बनाइने जेल छालामा प्रयोग गर्न उपयुक्त नहुने वैज्ञानिकहरूले नै औँल्याएका छन् । तपाईलाई थाहा छ, अल्कोहल प्रयोग गरेर बनाइएका हातमा लगाउने जेलमा प्रायः छालालाई नरम बनाउने तत्व पनि हुन्छन् । त्यसमा अल्कोहलको मात्रा ६० देखि ७० प्रतिशत हुन्छ ।

प्रत्येक १५ मिनेटमा पानी खाने

धेरै जनाले सामाजिक सञ्जालमा प्रेषित गरेको एउटा सन्देशमा एक “जापानी चिकित्सक“लाई उद्धृत गर्दै प्रत्येक १५ मिनेटमा पानी खानुपर्छ भनिएको छ । उनका अनुसार त्यसो गर्दा मुखबाट शरीरमा प्रवेश गरेका भाइरसलाई बाहिर निकाल्न सकिन्छ ।

त्यो सन्देश अरबी भाषामा हजारौँ पटक शेयर भएको छ । तर प्राध्यापक ब्लूमफील्डले धेरै पानी खाँदा भाइरस पखाल्न सहयोग पुग्ने प्रमाण नभएको बताइन् । हावाबाट सर्ने भाइरसहरू श्वासनली हुँदै शरीरमा छिर्छन् । तीमध्ये केही मुखमा जान सक्छन् । तर बारम्बार पानी खाए पनि तपाई सङ्क्रमणबाट जोगिन सक्नुहुन्न । तैपनि पानी खानु र शरीरमा पानीको मात्रा कम हुन नदिनु राम्रो हो ।

तातोपानीको प्रयोग गर्ने, आईसक्रीम नखाने

भाइरसलाई तातोले मार्ने दावीसहित तातोपानी सेवन गर्ने, तातोपानीले नुहाउने वा कपाल सुकाउने उपकरण प्रयोग गर्ने जस्ता सुझाव पनि दिइएको छ । विभिन्न देशका सामाजिक सञ्जाल प्रयोगकर्ताहरूले शेयर गरेका सन्देशमा यूनिसेफलाई अनुचित रूपमा उद्धृत गरिएको छ । तिनमा तातोपानी सेवन गर्ने र घाममा बस्ने गर्नाले भाइरस मर्छन् भन्ने दावी गरिएको छ तथा आईसक्रीम नखान सुझाव दिइएको छ ।

कोरोना भाइरस प्रकोपबारे फैलिएका अफवाह र मिथ्या समाचारको चिरफार गर्दै प्राध्यापक ब्लूमफील्डका अनुसार भाइरसका लागि शरीरलाई अनुपयुक्त बनाउन शरीर तातो राख्ने प्रयास गर्ने वा घाममा बस्ने कुरा पूर्णतया अप्रभावकारी हुन् ।
उनका अनुसार शरीरबाहिर भाइरस मार्न झन्डै ६० डिग्री सेल्सीअस तापक्रम चाहिन्छ जुन साउना वा तातोपानीले नुहाउँदाभन्दा अत्यधिक हो ।

तन्ना वा रुमाल ६० डिग्रीमा धुनु राम्रो हो । किनभने त्यसो गर्दा कपडामा भएका भाइरस मर्छन ्। तर छाला सफा गर्ने यो उपाय व्यावहारिक छैन । अनि तातोपानीले नुहाउँदा वा तातो पदार्थ सेवन गर्दा शरीरको तापक्रममा परिवर्तन हुँदैन । बिरामी नभएसम्म शरीरको तापक्रम स्थिर रहन्छ ।