क्यालिफोर्नियाका नागरिकहरुलाई घर बाहिर निस्कन प्रतिबन्ध

७ चैत, एजेन्सी । अमेरिकामा कोरोना भाइरस ‘कोभिड–१९’ को सङ्क्रमण बढ्दै गएपछि क्यालिफोर्निया राज्यका नागरिकलाई ‘घरभित्रै रहन’ भनिएको छ । भाइरसको सङ्क्रमण थप फैलिन नदिन क्यालिफोर्निया राज्यले नागरिकहरुलाई अनावश्यक रुपमा घरबाट बाहिर ननिक्लिन भनेको छ ।

गभर्नर गभिन न्युसमले क्यालिफोर्नियाका नागरिकले भाइरसको महामारीका बीच आवश्यक पर्दा मात्र घरबाहिर निस्कन सक्ने बताए । गभर्नर न्युसमले यसअघि नै चार करोड जनसङ्ख्या रहेको राज्यमा आउँदो दुई महिनामा आधाभन्दा बढी भाइरसको सम्पर्कमा आउन सक्ने बताएका थिए ।

अहिलेसम्म कोरोनाका कारण अमेरिकामा दुई सय १८ जनाको ज्यान गएको छ भने १३ हजार तीन सय १६ जनामा सङ्क्रमण पाइएको छ । सङ्क्रमितमध्ये एक सय २१ जना उपचारपछि घर फर्किएका छन् । ‘यो हामीले कडा निर्णय लिने समय हो । हामीले वास्तविकतालाई बुझ्नु आवश्यक छ’, गर्भनर न्युसमले भने ।

कोरोनाका कारण अमेरिकाले यो वर्ष हुने भनिएको जी–७ देशहरुको सम्मेलन पनि रद्द गरेको छ । अब यो सम्मेलन भिडियो कन्फ्रेन्सको माध्यमबाट गरिनेछ । यो सम्मेलन आउँदो जुन महिनामा क्याम्प डेविडमा हुने तय भएको थियो ।