कोरोना आशंका गरिएका दुई बिरामीको वीर अस्पतालमा मृत्यु !

१७ चैत्र, काठमाडौं । वीर अस्पतालमा कोरोना आशंकामा गरिएका दुई बिरामीको काठमाडौंको वीर अस्पतालमा मृत्यु भएको छ । मृत्यु हुनेमा भारतबाट हालै फर्किएका ५० वर्षका पुरुष र चन्द्रागिरि नगरपालिका सतुंगलकी ३४ वर्षकी महिला छन् ।

निमोनियाको समस्या देखिएकी महिलालाई आइतबार साँझ अस्पताल ल्याइएको थियो । उनको सोमबार विहान मृत्यु भएको हो । ज्वरो आएर अस्पताल उपचारका लागि आएका पुरुषको सोमबार दिउँसो मृत्यु भएको अस्पतालले जानकारी दिएको छ ।

वीर अस्पतालकाका अनुसार महिलालाई आइतबार साँझ बेहोस अवस्थामा अस्पतालमा भर्ना गरिएको थियो । भारतबाट यही साता नेपाल आएकी उनलाई अस्पताल ल्याउँदा ज्वरो आएको, सास फेर्न पनि गाहो भइरहेको थियो, उनका आफन्तले जनाएका छन् ।

वीर अस्पतालका निर्देशक डा. केदार सेञ्चुरीका अनुसार दुबै जनाको कोरोना संक्रमण परीक्षणका लागि राष्ट्रिय जनस्वास्थ्य प्रयोगशालामा नमुना पठाइएको छ । तर रिपोर्ट आएको छैन ।