कांग्रेस सभापति देउवाद्वारा ११ बुँदे ध्यानाकर्षण

१८ चैत्र, काठमाडौं । नेपाली कांग्रेसका सभापति शेरबहादुर देउवाले कोरोना भाइरसको संभावित संक्रमणबाट जोगिन देश लकडाउनमा जाँदा अन्य क्षेत्र जस्तै सञ्चारमाध्यममा पनि प्रभाव परेको भन्दै पत्रकारहरुका लागि समेत विशेष राहतको व्यवस्था गर्न सरकारको ध्यानाकर्षण गराएका छन् ।

आज सरकारको ध्यानाकर्षण गर्न ११ बुँदासहितको मागपत्र प्रस्तुत गर्दै सभापति देउवाले लकडाउनले व्यवसायलाई प्रभावित पार्दा त्यसले स्वभाविक रुपमा विज्ञापनलाई समेत असर पार्ने भएकाले राज्यको चौथो अंगका रुपमा रहेका सञ्चार गृह तथा पत्रकारहरुका लागि बेग्दै राहत योजना ल्याउन माग गरेका हुन् ।

यसका साथै उनले २० लाख रुपैयाँसम्म ऋण लिएका साना व्यवसायीका लागि तीन महिनासम्मको बैंकको व्याज मिनाहा गर्नसमेत आग्रह गरेका छन् ।

यसैगरी शहरी क्षेत्रमा डेरा गरी बस्ने विद्यार्थीका हकमा पनि सरकारले अलग रुपमा राहतको व्यवस्था गर्नुपर्ने माग गर्दै सभापति देउवाले भारतका विभिन्न स्थानबाट आई महाकाली पारी धार्चुलामा अलपत्र परेका नेपालीलाई देशभित्र आउने व्यवहारिक बाटो खोज्नसमेत आग्रह गरेका छन् ।