कोरोना कोषलाई पूर्वराजा ज्ञानेन्द्रले दिए २ करोड

१८ चैत्र, काठमाडौं । पूर्वराजा ज्ञानेन्द्र शाहले कोरोना भाइरस संक्रमण बिरुद्ध खर्च गर्न सरकारद्वारा स्थापित कोषमा दुई करोड रुपैयाँ दिने घोषणा गरेका छन् ।

आज साँझ पूर्वराजा ज्ञानेन्द्रले जारी गरेको सन्देशमा यस्तो घोषणा गरिएको हो । पूर्वयुवराज्ञी हिमानी शाहका नाममा स्थापित हिमानी ट्रष्टमार्फत उक्त रकम उपलव्ध गराइने जानकारी पूर्वराजा ज्ञानेन्द्रले दिएका हुन् ।

जारी सन्देशमा भनिएको छ– आपतविपतको घडीमा सबैका साथमा साथ दिंदै हाम्रो तर्फबाट हिमानी ट्रष्टमार्फत दुई करोड रुपैयाँ दिई नेपाल सरकारको कोरोना भाइरस संक्रमण, रोकथाम नियन्त्रण र उपचार कोषमा दाखिला गर्न उपलव्ध गराएका छौं । आफ्नो सन्देशमा पूर्वराजा ज्ञानेन्द्रले भनेका छन् – जारी राहत र उद्धारलाई अझै व्यवस्थित बनाउन सकियो भने थप प्रभावकारी हुने छ ।

अहिलको परिस्थितिमा कोरोना भाइरसबिरुद्धको लडाईं जित्न लकडाउनको विकल्प नभएको भन्दै पूर्वराजाले यसको इमान्दारिताका साथ पालना गर्न सबैलाई अपिल गरेका छन् ।