सप्तरीका क्वारेन्टाइनमा भर्ना हुनेको संख्या २०१ पुग्यो

धीरुभाइ

२० चैत्र, राजविराज । सप्तरीका विभिन्न स्थानीय सरकारले सञ्चालन गरेको क्वारेन्टाइनमा भर्ना हुनेको संख्या २०१ पुगेको छ । क्वारेन्टाइनमा भर्ना भएका मध्ये नौ महिला र १९२ पुरुष रहेका छन ।

कोरोना भाइरस संक्रमणबाट जोगाउन बिहीबार २३ जना थपिएपछि यो संख्या पुगेको हो । बुधबार क्वारेन्टाइनमा भर्ना हुनेहरुको संख्या १८१ थियो । तीमध्ये नौ महिला गरी १७२ पुरुष थिए । भर्नामध्ये तीन जना पुरुष बिहीबार डिस्चार्ज भएको स्वास्थ्य कार्यालय सप्तरीले जनाएको छ । जिल्लाको १८ वटै स्थानीय सरकारहरुले सञ्चालन गरेको क्वारेन्टाइनमा ४९५ बेड रहेको छ ।

हिजो कोरोना भाइरसको कुनैपनि लक्षण देखा नपरेपछि दुई जना महिला र २८ जना पुरुषलाई डिस्चार्ज गरिएको थियो । डिस्चार्ज भएकामध्ये जिल्लाको कञ्चनरुप नगरपालिकास्थित क्वारेन्टाइनबाट दुई महिला, चार पुरुष रहेको स्वास्थ्य कार्यालय सप्तरीले जनाएको छ । त्यस्तै डाक्नेश्वरी नगरपालिकाको क्वारेन्टाइनबाट चार, खडक नगरपालिकाबाट दुई, राजगढ गाउँपालिकाबाट दुई, रुपनी गाउँपालिका १५ र विष्णुपुर गाउँपालिकाबाट एक जनालाई डिस्चार्ज गरिएको स्वास्थ्य कार्यालय प्रमुख दुनियालाल यादवले जानकारी दिएका छन् ।

विभिन्न देशबाट आएका व्यक्तिहरुमा रुघाखोकी र ज्वरो देखिएकाले निगरानी राख्न क्वारेन्टाइनमा राखिएको भन्दै उनले सबैको अवस्था समान्य रहेको बताए । भाइरस संक्रमणको आशंका देखिने व्यक्तिहरुलाई उपचारका लागि चार वटा अस्पतालमा ५६ शैय्याको आइसोलेसन तथा १३ वटा आइसीयू तयारी अवस्थामा रहेको गजेन्द्रनारायण सिंह अस्पतालका मेडिकल सुपरिटेन्डेन्ट डा. चुमनलाल दासले जानकारी दिए ।