काठमाडौंमा भेटिएका कोरोना संक्रमित सशस्त्र प्रहरीका जवान

१ जेठ, काठमाडौं । सरकारले कोरोना भाइरसको संक्रमण जोखिम बढेपछि देशभर लकडाउन घोषणा गरेको छ। कोरोना भाइरसको संक्रमण रोकथाम तथा नियन्त्रणका लागि जारी लकडाउन कार्यान्वयन गर्न सुरक्षाकर्मी दिनरात खटिएका छन्।

मुख्यत: ट्राफिक प्रहरी र जनपद प्रहरी खटिएका छन् । ब्याकअपमा सशस्त्र प्रहरी खटिएको छ। सेनाले फाट्टफुट्ट जीपमार्फत् गस्ती गरिरहेको छ । कोरोना रोकथामका लागि लकडाउन गरे पनि यसलाई कार्यान्वयन गराउने सुरक्षाकर्मी भने खाली हात सडकमा खटिएका छन् । न उनीहरुसँग गुणस्तरीय मास्क छ, न त पन्जा नै । केहीले मेडिकल ग्लोब्स लगाएका पनि छन् ।

सडकमा सवारी रोक्ने, पास चेक गर्ने काम ट्राफिक र जनपद प्रहरीले गरिरहेका छन् । पास नलिएका सवारीलाई नियन्‍त्रणमा लिने काम पनि उनीहरुले गरिरहेका छन् । यसक्रममा सयौं व्यक्तिसँग उनीहरुको साक्षात्कार हुन्छ । एक हिसाबले भन्ने हो भने कोरोना भाइरस फैलिन नदिन लकडाउन कार्यान्वयनमा खटिएका उनीहरु आफैं कोरोनाको उच्च जाेखिममा छन् ।

यसैबीच, स्वास्थ्य मन्त्रालयले कोरोना भाइरस संक्रमित ब्यक्ति चन्द्रागिरि नगरपालिकामा भेटिएका ३२ वर्षीय पुरुष सुरक्षाकर्मी भएको खुलेको छ । बिहीवार बिहान ६:१५ बजे स्वास्थ्य मन्त्रालयले जारी गरेको विज्ञप्तिमा काठमाडौंकाे चन्द्रागिरिका पुरुषमा कोरोना पोजेटिभ देखिएको खुलेको थियो । बिहान मन्त्रालयले दुई जनामा कोरोना संक्रमण भएको जनाएको थियो ।

दुईमध्ये एक सशस्त्र प्रहरी बल बलम्बुमा कार्यरत प्रहरी कर्मचारी भएको चन्द्रागिरि नगरपालिकाका मेयर धनश्याम श्रेष्ठले नेपालबहस डटकम जानकारी दिए । उनी सशस्त्र प्रहरीकै कर्मचारी भएको खुलेको छ। उनी अहिले क्याम्पमा छन्, उनले भने । बलम्बुमा सशस्त्रको अस्पताल रहेको छ ।

त्यस्तै मंगलवार भक्तपुरको दुवाकोटमा पनि एक सशस्त्र प्रहरीमा कोरोना संक्रमण देखिएको थियो। साथै चन्द्रागिरिमा नै संक्रमण देखिएकी एक महिला पनि सशस्त्र प्रहरीकाे श्रीमती रहेको खुलेको थियो । उनी महेन्द्रनगरबाट काठमाडौं आएकी थिइन्।

सङ्क्रमित व्यक्ति स्वास्थ्यकर्मीको सम्पर्कमा रहेको पनि मन्त्रालयले जनाएको छ । यससँगै नेपालमा कोभिड–१९ पुष्टि भएकाको सङ्ख्या २४६ पुगेको छ ।