उपकुलपति नियुक्त गर्न कर्मचारीको माग

११ जेठ, काठमाडौं । पोखरा विश्वविद्यालयमा लामो समयदेखि उपकुलपतिलगायत पदाधिकारी नियुक्त नहुँदा पठनपाठनमा मात्र नभई समग्र प्रशासनिक काम ठप्प भएकाे भन्दै कर्मचारीहरुले तत्काल नियुक्ति प्रकृया थाल्न आग्रह गरेका छन् ।

प्रधानमन्त्री तथा शिक्षामन्त्रीले यो समस्यालाई समयमै संवोधन नगरे ठूलै समस्या आइलाग्ने भन्दै कर्मचारी वर्गले विश्वविद्यालयको साख र विश्वसनीयता जोगाउन माग गरेका छन् ।  पोखरा विश्वविद्यालय कर्मचारी संघका अध्यक्ष शिवराज पण्डितद्वारा आज जारी प्रेस विज्ञप्तिमा यी लगायत धेरै पक्षमा सरकारले ध्यान दिनुपर्ने माग गरिएको छ ।

विगत ८ महिनादेखि विश्वविद्यालय नेतृत्वविहिन अवस्थामा रहेको भन्दै यसले समग्र विकास र विस्तारमा बाधा उत्पन्न भएको विज्ञप्तिमा उल्लेख छ । गत असोजदेखि नै उपकुलपति पद रिक्त छ । उपकुलपति पदपूर्ति गर्न सरकारले ध्यान नदिंदा समस्या परेको भन्दै विज्ञप्तिमा पटकपटक कार्यबाहक उपकुलपति तोक्दा नराम्रो सन्देश गएको पनि उल्लेख गरिएको छ ।

कार्यबाहक उपकुलपतिको म्याद गत बैशाख २२ बाटै समाप्त भइसकेको छ । विश्वविद्यालयको मूल नेतृत्व नियुक्त हुन नसक्दा कार्यकारी परिषद र प्राज्ञिक परिषदका बैठक कानूनी रुपमा बस्न नसक्दा शैक्षिक, प्राज्ञिक र परीक्षासम्बन्धी अनेकौं काममा बाधा आइपरेको पनि विज्ञप्तिमा उल्लेख गरिएको छ ।

यसैबीच तीनवटा संकायका डीन,तीन कार्यकारी निर्देशक र परीक्षा नियन्त्रकको पदावधिसमेत सकिएको छ । यी पदको पदपूर्ति गर्नसमेत उपकुलपति अनिवार्य भएको भन्दै कर्मचारी संघले यथाशीघ्र नियुक्ति प्रकृया अगाडि बढाउन आग्रह गरेको छ । लकडाउनका बेला अनलाइन प्रविधिमार्फत कक्षा सञ्चालन गर्नसमेत आवश्यक निर्णय गर्न उपकुलपतिलगायत पदाधिकारी आवश्यक पर्ने हुन्छ ।

निजी क्षेत्रको समेत सहभागितामा सञ्चालन हुने यस विश्वविद्यालय अन्तर्गत चारवटा आंगिक,५८ वटा निजी र चारवटा संयुक्त आंगिक कलेजहरु रहेका छन् । साथै, यस विश्वविद्यालय अन्तर्गत झण्डै ४० हजार विद्यार्थी अध्ययनरत छन् ।