नेविसंघले जलायो त्रिवि उपकूलपतिको कुर्सी

१० असार, काठमाडौँ । त्रिभुवन विश्वविद्यालयका उपकूलपति प्राध्यापक डाक्टर धर्मकान्त बाँस्कोटाको कार्यकक्षमा आगजनी गरिएको छ । त्रिवि परिसर किर्तिपुरमा रहेको उपकुलपतिको कार्यकक्षमा नेपाल विद्यार्थी संघले आगजनी गर्दा कुर्सी जलेको छ ।

विभिन्न मागका विषयमा उपकूलपतिलाई ध्यानाकर्षण गराउन खोज्दा दुव्र्यवहार भएपछि आगजनी र तालाबन्दी गरिएको नेविसंघका नेता हरि आचार्यले बताए । यसअघि जेठ ३२ गते विश्वविद्यालयमा राजनीतिक भागबण्डा बन्द गर्नुपर्ने, सिनेटमा विद्यार्थीको पनि प्रतिनिधित्व गराउनुपर्ने र विद्यार्थीका मागलाई सम्बोधन गर्नुपर्ने माग नेविसंघले उठाएको थियो ।

तर माग सम्बोधन नगरेपछि बुधबार ध्यानाकर्षण गराउँदा दुव्र्यवहार भएपछि आक्रोशित विद्यार्थीले आगजनी गरेका उनले बताए । आक्रोशित विद्यार्थीले कार्यकक्षबाट कुर्सी बाहिर ल्याएर आगजनी गरेका छन । साथै त्रिवि उपकूलपति बाँस्कोटाविरुद्ध नाराबाजी र प्रदर्शन गरेका थिए ।नेविसंघका त्रिवि इकाई समिति अध्यक्ष समेत रहेका आचार्यले आफ्ना माग सम्बोधन नभएसम्म आन्दोलन नरोक्ने पनि चेतावनी दिएका छन ।