पीसीआर मेशिन खरिद गरेर परीक्षण थाल्दै सेना, प्रहरी र सशस्त्र

१८ असार, काठमाडौं । सरकारले कोरोना परीक्षणको दायरा फराकिलो बनाउन नसक्दा सुरक्षाकर्मी आफैले कोरोना परीक्षण गर्ने भएका छन । फौजमा संक्रमितको संख्या बढ्दै जान थालेपछि सेना, प्रहरी र सशस्त्रले आफैं पीसीआर मेसिन खरीद गरेर परीक्षण गर्ने तयारी थालेका हुन ।

यसका लागि तीन वटै सुरक्षा संयन्त्रले पीसीआर मेसिन जडान गर्दैछन । सेनाले सैनिक अस्पताल, छाउनीमा राख्ने गरी पीसीआर मेसिन खरिदका लागि टेण्डर खुलाएको छ । सशस्त्र प्रहरीले पनि मेसिन खरिदका लागि टेण्डर खुलाएको सशस्त्र प्रहरी अस्पतालका डीएसपी डा. प्रविण नेपालले बताए ।

नेपाल प्रहरी अस्पतालमा बुधबार जडान गरिएको पीसीआर मेसिनको प्रहरी महानिरीक्षक ठाकुरप्रसाद ज्ञवालीले उद्घाटन गरेका छन । अब प्रहरी, आरोपित, अभियुक्त लगायत सबैको पीसीआर परीक्षण गरिने भएको छ ।

यस्तै नेपाली सेनाका एक हजार सैनिक अधिकारी संयुक्त राष्ट्रसंघको शान्ति मिसनमा जाँदैछन् । महामारीका कारण तीन महिना रोकिएको बदली पुनः सुरु भएसँगै उनीहरुलाई पाँचखालस्थित वीरेन्द्र शान्ति कार्य तालिम केन्द्रको क्वारेन्टिनमा राखिएको छ ।

यूएनले उनीहरुको पीसीआर रिपोर्ट अनिवार्य पठाउन भनेको छ । त्यसैले जाँचका लागि सेनाले पनि आफैं पीसीआर मेसिन खरिद गर्न लागेको सैनिक प्रवक्ता विज्ञानदेव पाण्डेले जानकारी दिए ।

विदामा रहेका र कार्यक्षेत्रमा खटिएका सेनाको अनिवार्य पीसीआर परीक्षण गर्ने तयारी रहेकाले सेना, प्रहरी र सशस्त्रले पनि मेशिन खरिद गरेर परीक्षण अगाडी बढाउन लागेका हुन ।

सरकारले यसअघि दैनिक १० हजारको परीक्षण गर्ने बताएको थियो । तर सरकारको काम सुस्त भएपछि सेना, प्रहरी र सशस्त्र आफैले परीक्षण थालनी गर्न लागेको हो ।