बझाङमा पहिरो जादा १७ घर पुरिए, ७ जना बेपत्ता !

२० असार, बझाङ । बझाङमा पहिरोमा परी १७ घर पुरिएका छन् । केदारस्यु गाउँपालिका वडा नम्बर ८ को एक बस्तीमा पहिरो जाँदा १७ घर पुरिएको प्रारम्भिक अनुमान छ ।

शुक्रबार राति वर्षा सँगै गाउँ माथिबाट आएको पहिरोले वडा नम्बर ८ को मल्लेसका १७ घर बगाएको प्रारम्भिक खबर आएको बझाङ प्रहरी प्रमुख डिएसपी गणेश बमले जानकारी दिए ।

उनले पहिरोमा परि केही बेपत्ता भएको खबर आएको तर यकिन विवरण भने आइनसकेको बताए। राति घरमा सबै सुतेको वेला पहिरो आएकाले क्षति अलि बढी नै भएको हुन सक्ने प्रहरीको अनुमान छ । प्रहरी प्रमुख डिएसपी बमले घटनास्थलमा प्रहरी टोली पठाइएको जानकारी दिए ।

यसैबीच, अबिरल वर्षासँगै गाउँ माथिबाट आएको पहिरोले १७ घर बगाएको र ७ जना बेपत्ता भएका छन्। पहिराेले सिंगो वस्ती नै पहिरोको चपेटामा परेको छ ।  त्यहाँको एउटा पावरहाउस पनि पहिरोले पुरिएको छ ।

घटनास्थल पुग्न जयपृथ्वी राजमार्गअन्तर्गत झोता भन्ने स्थानबाट करिब चार–पाँच घण्टा माथि उक्लिनुपर्छ । त्यहाँसम्म पुग्न हालै शाखा सडक बनाइएको थियो । सो सडक पनि पहिरोले बगाएको छ ।