नेपाल प्रहरीमा आईजीपी थापाको अग्निपरीक्षा शुरु

काठमाडौं । बर्षौदेखि नातावाद, कृपावाद, सत्ता, शक्ति र राजनीतिक खिचातानीबाट ग्रसित नेपाल प्रहरीको क्षमता र बहादुरी फर्काउने अपेक्षासहित आईजीपी शैलेश थापा क्षेत्रीले कार्यभार सम्हालेका छन । बिहीबार बिहान सिंहदरबारमा गृहसचिव महेश्वर न्यौपानेबाट दर्ज्यानी चिन्ह लगाएपछि थापाले प्रहरी मुख्यालय नक्साल पुगेर कार्यभार सम्हालेका हुन ।

उनको कार्यकाललाई नेपाल प्रहरीको पुरानै छवि फर्काउने समयका रुपमा हेरिएको छ । खासगरी कुनै राजनीतिक खिचातानी नभई स्वच्छ प्रतिष्पर्धा, बरिष्ठता र संगठनभित्रको योगदानको सही मूल्यांकनबाट उनी आईजीपी बनेको भन्दै चौतर्फी प्रशंसा छ । उनको स्वभाव र योगदानबाट प्रभावित भएका प्रतिष्पर्धी एआईजी हरिबहादुर पालले समेत थापालाई सफल कार्यकालको शुभकामना दिएका छन ।

उनको विगतको कामबाट प्रभावित भएका प्रधानमन्त्री केपी शर्मा ओलीले यतिबेला दायाबाया नहेरी सोझै उनलाई आईजीपीको फुली लगाएका हुन । यो ऐतिहासिक जिम्मेवारी पाएका थापालाई अब चुनौति पनि कम छैन । खासगरी पछिल्लो समय नेपाल प्रहरीभित्रै बढ्दै गएको विकृति हटाउनुपर्ने जिम्मेवारी उनीमाथि छ ।

सामाजिक सञ्जालमा उनीप्रति धेरैले देखाएको सदा सहायता र सहयोग पनि यसैको अपेक्षास्वरुप हो । विगतमा पनि कुनै ठूलो आन्तरिक विवाद र चलखेलमा सलंग्न नभएका उनलाई झण्डै दुई बर्षको कार्यकाल सफल मात्रै होइन, नेपाल प्रहरीको विगतको बहादुर छविलाई फेरि फर्काएर उजिल्याउने जिम्मेवारी पनि छ ।

यो आईजीपी थापाका लागि सजिलो छैन । यदि उनले चाहेमा असम्भव पनि देखिदैन । तर उतारचढाव चाँही थुप्रै झेल्नुपर्नेछ । बाँकी त उनको कार्यशैली, सोच, व्यवहार र कार्ययोजनाअनुसारको कामले देखाउँनेछ ।