यातायात व्यवसायीले भने- ‘गाडी चलाउँदैनौं, सरकारलाई चाबी बुझाउँछौं’

काठमाडौं । कोरोना महामारीमा सार्वजनिक गाडी चलाउन दिएको भन्दै आक्रोश बढेका बेला सार्वजनिक यातायात केन्द्रीय महासंघले भने गाडी नलचाउने बताएको छ । शुक्रबार पत्रकार सम्मेलन गरेको महासंघले तत्काल गाडी नचलाउने निर्णय गरिएको बताएको हो ।

सरकारले पूर्व तयारीविना सार्वजनिक यातायात सञ्चालन गर्न भनेर अव्यवहारिक र खतरनाक कदम चालेको भन्दै महासंघका अध्यक्ष होमप्रसाद अधिकारीले भने, ‘हामी गाडी चलाउँदैनौं, सरकारलाई चाबी बुझाउँछौं ।’

महासंघले स्वास्थ्य संगठनले तोकेको मापदण्ड अनुसार यातायात मजदुर र आम यात्रुहरुको स्वास्थ्यलाई दृष्टिगत गरी सम्पूर्ण व्यवस्था हुनुपर्ने, बैंक किस्ता तथा ब्याजमा पुनर्तालिकीकरण हुनुपर्ने, कागज पत्र, कर राजश्वमा बन्दाबन्दी अवस्थाको कर छुट हुनुपर्ने, बन्दाबन्दीको अवस्थाको बिमा प्रिमियम छुट समयावधि समायोजन गरेमात्रै गाडी चलाउने बताएका छन ।

पाँचबुँदे माग पुरा नभए आफूले गाडी नचलाउने यातायात व्यवसायीको भनाई छ ।