पहिलोपटक आईजीपीलाई प्रधानसेनापतिले दिए बधाई

काठमाडौं । नेपाल प्रहरीका प्रमुख आईजीपी शैलेश थापा क्षेत्रीलाई नेपाली सेनाका प्रधानसेनापति पूर्णचन्द्र थापाले भेटेरै बधाई दिएका छन । प्रहरी प्रधान कार्यालय नक्साल पुगेर प्रधानसेनापति थापाले नवनियुक्त आईजीपी थापालाई बधाई दिएका हुन ।

खासगरी विभागीय संगठनमा एकअर्कामा समन्वयभन्दा बढी रिस र आवेग पोख्ने प्रवृत्ति बढ्दो थियो । केही समययता  नेपाली सेनाभित्रका विकृतिलाई क्रमश हटाउन लागिपरेका प्रधानसेनापति थापाले नेपाल प्रहरीमा पनि यही अपेक्षाका साथ आएका नवनियुक्त आईजीपी थापालाई भेटेर बधाई दिएकाे देखिन्छन ।

आईजीपी थापालाई प्रधानसेनापति थापाले सफल कार्यकालको शुभकामना व्यक्त गरेका छन । अनौपचारिक रुपमा कुराकानी र सरसल्लाह हुने भएपनि विभागीय संगठनमा नेपाली सेनाका प्रमुखले नेपाल प्रहरीका प्रमुखलाई भेटेरै शुभकामना दिएको सम्भवतः यो पहिलोपटक हो ।

प्रधानसेनापति र आईजीपी थापाका बीचमा दुवै संगठन मिलेर आपसी हित, सहकार्य र समन्वयका विषयमा छलफल भएको थियो । भेटका क्रममा प्रधानसेनापति थापाले प्रहरी महानिरीक्षक थापा क्षेत्रीलाई अनुभव र ज्ञानको संगालो रहेका पुस्तकहरू र राष्ट्रको सुरक्षाको संकेतको रुपमा रहेको राष्ट्रिय हतियार खुकुरी समेत प्रदान गरेका थिए ।

प्रहरी महानिरीक्षक थापाले पनि प्रधानसेनापति थापालाई मायाको चिनो स्वरूप ‘मोमेन्टो’ प्रदान गरेका थिए ।