गाडी किन्नेलाई कर्जा सीमा पुरानै !

२ साउन, काठमाडौं । नेपाल राष्ट्र बैंकले निजी सवारी साधनको खरिदलाई प्रोत्साहन गर्ने व्यवस्थालाई कायमै राखेको छ । निजी प्रयोजनका सवारीलाई बिलासी साधनका रुपमा ब्याख्या गर्दै आएको सरकारले यो वर्ष पनि अटो कर्जाको व्यवस्थालाई निरन्तरता दिएको हो ।

शुक्रबार नेपाल राष्ट्र बैंकले सार्वजनिक गरेको मौद्रिक नीतिमा अटो कर्जाबारे थप व्यवस्था छैन । पुरानै व्यवस्था यथावत राखिएकाले त्यसबारे नीतिमा यसबारे थप व्यवस्था नगरिएको राष्ट्र बैंकको भनाई छ ।

यसअघि सवारीको मूल्यमा ५० प्रतिशतसम्म ऋण पाइने व्यवस्था थियो । यथावत राखिएको व्यवस्थाअनुसार निजी सवारी किन्नेले मूल्यको ५० प्रतिशत रकम डाउन पेमेन्टको जोहो गरेपछि बैंकले ५० प्रतिशत ऋण दिने छन् ।

सरकारले वैदेशिक मुद्राको सञ्चितिलाई ध्यानमा राख्दै विगतदेखि नै डाउन पेमेन्टमा कडाइ गर्दै आएको छ ।