आईपीएलको सुपरओभरमा मूम्बई अभागी, बेंग्लोरको रोमाञ्चक जित

१३ असोज, एजेन्सी । इण्डियन प्रिमियर लिग आईपीएलमा रोयल च्यालेन्जर्स बेंग्लोरले मुम्बई इण्डियन्सलाई हराएको छ । दुवै टिमले समान २०१ रन बनाएपछि सुपरओभरमा धकेलिएको खेलमा बेंग्लोरले १० विकेटको जित हात पारेको हो ।

मुम्बईले दिएको ८ रनको सामान्य लक्ष्य बेंग्लोरले अन्तिम बलमा चौका हान्दै पूरा गरेको हो । सुपरओभरमा व्याटिङ गर्न आएका विराट कोहली र एबी डिभिलियर्सले एक एक चौका हाने । अन्तिम बलमा जितका लागि १ रन चाहिएका बेला कोहलीले चौका हान्दै बेंग्लोरलाई तेस्रो जित दिलाएका हुन् ।

मुम्बईका विष्फोटक व्याट्सम्यान किरन पोलार्ड र हार्दिक पाण्डेले सुपरओभरमा अपेक्षित प्रदर्शन गर्न सकेनन् । पोलार्डले एक चौका हानेपनि अर्को बलमा आउट भएका थिए । सुपर ओभरको सामान्य लक्ष्यलाई बेंग्लोरले अन्तिम बलमा भेट्टायो ।

विशाल लक्ष्यको रोमाञ्चक खेल

दुबईमा टस हारेर पहिले व्याटिङ गरेको बेंग्लोरले २०१ रन बनाएको थियो । निर्धारित २० ओभरमा ३ विकेट गुमाएर २०१ रन बनाउनु आफैमा उत्कृष्ट प्रदर्शन हो । बेंग्लोरका लागि देवदुत पाडिकल, आरोन फिन्च र एबी डिभिलियर्सले अर्धशतक पूरा गरे ।

फिन्चले ५२, पाडिकलले ५४ र डिभिलियर्सले ५५ रन बनाए । मुम्बईका ट्रेन्ट बोल्टले २ विकेट लिए । २०१ रनको विशाल लक्ष्य पछ्याएर जवाफी व्याटिङ थालेको मुम्बईको शुरुवात भने खराब रह्यो । उसका लागि कप्तान रोहित शर्मा ८ रनमै आउट हुँदा सुर्य यादव शुन्यमै आउट भए । बेंग्लोरका कप्तान विराट कोहली पनि मात्रै ३ रन बनाएर पेभेलियन फर्किएका थिए ।

अर्का ओपनर क्वीन्टन डीकक र हार्दिक पाण्ड्या पनि सस्तैमा आउट भएपछि मुम्बई एक समय हार नजिक पुगेको थियो । तर ईशान किसान र किरण पोलार्डले शानदार व्याटिङ गरे । किसानले ९९ रन बनाउँदा पोलार्ड ६० रनमा नटआउट रहे ।

शतकसँगै जित्नेगरी विष्फोटक व्याटिङ गरेका किसान खेलको अन्त्यतिर उदानको बलमा क्याचआउट भए । त्यसपछि क्रिजमा रहेका पोलार्डले छक्का र चौकाको बर्षा गराउँदै खेल जितनजिक पुर्याएका थिए ।

मुम्बई सुपरओभरमा अभागी

तर अन्तिम बलमा ५ रन चाहिएका बेला चौका मात्रै हानेपछि मुम्बईको स्कोर पनि २०१ रन मात्रै बन्यो । खेल सुपरओभरमा जाँदा पोलार्ड र हार्दिक पाण्डया व्याटिङमा आएपनि रन बनाउन सकेनन् । जसकारण खेलमा उत्कृष्ट प्रदर्शन गरेको मुम्बई सुपरओभरमा अभागी साबित भयो ।

जितसँगै बेंग्लोर ३ खेलबाट ४ अंकसहित लिगको तेस्रो स्थानमा उक्लिएको छ । समान अंक भएपनि नेट रनरेटका आधारमा दिल्ली पहिलो, राजस्थान दोस्रो स्थानमा छन् ।