प्रदेश राजधानी दाङ बनाउने निर्णयविरुद्ध बुटवलमा प्रदर्शन

१६ असोज, रुपन्देही । प्रदेश ५ सरकारले दाङलाई स्थायी राजधानी बनाउने प्रस्ताव अघि सारेपछि नेपाली कांग्रेस आन्दोलित भएको छ । शुक्रबार प्रदेशसभा बैठकमा प्रदेशका आन्तरिक मामिला तथा कानुनमन्त्री कूलबहादुर केसी सोनामले राजधानी र नामकरण निर्धारणसम्बन्धी कार्यविधि पेस गरेर प्रस्ताव अगाडि बढाएपछि कांग्रेसका नेता कार्यकर्ता आन्दोलनमा उत्रिएका हुन् ।

आफ्नो सभापति तथा तत्कालिन प्रधानमन्त्री शेरबहादुर देउवा नेतृत्वको सरकारले रुपन्देहीलाई अस्थायी राजधानी तोकेकोले स्थायी राजधानी सोही ठाउँलाई बनाउनु पर्ने कांग्रेस रुपन्देहीको माग छ ।

बहुसंख्यक जनताको केन्द्र, पूर्वाधारका हिसाबले उपयुक्त रुपन्देहीबाट राजधानी सारेर दाङ लैजाने नेकपा सरकारको निर्णयप्रति कठोर आन्दोलन सुरु भएको कांग्रेसले उद्घोष गरेको छ ।

यसैबीच, राजधानी सार्ने निर्णयविरुद्ध नेपाल विद्यार्थी संघले पनि बुटवलमा विरोध प्रदर्शन गरेको छ । शुक्रबार प्रदेशसभा बैठकमा प्रदेशका आन्तरिक मामिला तथा कानुन मन्त्रीले राजधानी र नामाकरण निर्धारणसम्बन्धी कार्यविधि पेस गरेर प्रस्ताव अघि बढाएपछि नेविसंघले बुटवलका विभिन्न स्थानमा टायर बालेर नारा जुलुस सुरु गरेको जनाएको छ ।

प्रदर्शन चर्किएपछि भीड नियन्त्रण गर्न प्रहरीलाई हम्मे हम्मे परेको छ ।