उधारो सहमति भएपछि ‘हर्टअट्याक’ भएर उखु किसानको मृत्यु

१४ पुष, काठमाडौं । सरकारसँग उधारो सहमति भएछि उखु किसानलाई ‘हर्टअट्याक’ भएको छ । सरकारसँग उधारो सहमति भएपछि ‘हर्टअट्याक’ भएका किसानको उपचारका क्रममा मृत्यु भएको छ । झण्डै दुई हप्ता माइतीघरमा आन्दोलन गरेका किसानले हिजो सरकारसँग २१ दिनमा भुक्तानी गर्ने सहमति भएको थियो ।

सर्लाहीका रामनारायण यादव भगत काठमाडौँको आन्दोलनमा सहभागि भएर बक्यौता पाउने आशमा थिए । अन्नपूर्ण सुगर मिलबाट झण्डै २५ लाख रुपैयाँ भुक्तानी लिन बाँकी रहेका उनी उधारो सहमति भएपछि मुर्छित परेका थिए ।

अस्पताल लगेर जाँच गर्दा उनलाई हृद्यघात भएको थियो । हृद्यघात भएपछि उपचारका लागि गंगालाल अस्पताल लगिएपनि उपचारका क्रममा उनको मृत्यु भएको हो । विगत ३ वर्षदेखि उनले अन्नपूर्ण सुगर मिलबाट २४ लाख ६५ हजार रुपियाँ लिन बाँकी थियो ।

माइतीघरमा किसानलाई आन्दोलन गर्न लगाएर सरकारसँग सम्झौता गर्न बिचौलिया पुगेका आरोप छ । बिचौलियाले गर्दा नै उधारो सहमति भएपछि किसान रुष्ट थिए ।