पारसले बनाएर शतक, चौकाको वर्षा

२७ फाग्न, काठमाडौं । काठमाडौं मेयर्स कप एकदिवसीय क्रिकेट सिरिजअन्तर्गत त्रिभुवन आर्मी क्लबविरुद्ध बागमती प्रदेश टिमका ब्याट्सम्यान पारस खड्काले शतक पूरा गरेका छन् ।

उनले १२२ बलमा नौ चौका र दुई छक्का हिर्काउँदै शतक पूरा गरेका हुन् ।

जारी प्रतियोगितामा पारसको यो पहिलो शतक हो । उनी यसअघि खेलेका तीन खेलमा सस्तैमा आउट भएका थिए । आज भने पारस लयमा देखिएका छन् ।

टस हारेर ब्याटिङको मौका पाएको बागमतीले यो समाचार तयार पार्दासम्म ४० ओभरमा पाँच विकेट गुमाएर १ सय ८५ रन बनाएको छ ।

बागमतीले यसअघि इशान पाण्डेलाई २६, कप्तान ज्ञानेन्द्र मल्ललाई ६, पृथु बाँस्कोटालाई १२, आदिल खानलाई २१ र आकाश थापालाई शून्य रनमै गुमाइसकेको छ । जारी प्रतियोगितामा बागमतीले तीन म्याच खेल्दा दुईमा हार र एक खेलमा जित हासिल गरेको छ ।

फाइनलमा पुग्न बागमतीले आजको खेल राम्रो नेट रनरेटमा जित्नुपर्ने हुन्छ । यतिले मात्र बागमतीलाई पुग्ने छैन । मूलपानीमा जारी पुलिस क्लबविरुद्ध मेयर्स-११ ले जित हासिल गर्नु पर्नेछ ।