डेब्यू म्याचमै सूर्यले रचे इतिहास, बनाए २ कीर्तिमान

काठमाडौं । भारतीय क्रिकेट टिमका ब्याट्सम्यान सूर्यकुमार यादवले नयाँ कीर्तिमान बनाएका छन्। उनले अन्तर्राष्ट्रिय टी–२० क्रिकेटको पहिलो पारीमै छक्काबाट खाता खोल्ने ब्याट्सम्यानको रेकर्ड आफ्नो नाममा लेखाएका छन्।

इंग्ल्याण्डसँगको पाँच म्याचको टी–२० सिरिजअन्तर्गतको चौथो खेलमा उनले पहिलो बलमै छक्का हिर्काए। योसँगै उनी अन्तर्राष्ट्रिय टी–२० करियरको पहिलो बलमै छक्का प्रहार गर्ने पहिलो भारतीय ब्याट्सम्यान बनेका छन्।

समग्र विश्व क्रिकेटमा भने यो कीर्तिमान बनाउने सूर्य आठौँ ब्याट्सम्यान हुन्।

यसअघि पाकिस्तानका सोहेल तनवीर, वेष्ट इण्डिजका जेरोम टेलर, जेभियर मार्शल, किरण पोलार्ड, टिनो बिस्ट, दक्षिण अफ्रिकाका मंगलिसो मोसेले र आयरल्याण्डका मार्क आदिरले पहिलो पारीको पहिलो बलमै छक्का हिर्काइसकेका छन्।

सूर्यकुमारले आफ्नो पहिलो अन्तर्राष्ट्रिय टी–२० पारीमा ३१ बलमा ६ चौका र ३ छक्काको मद्दतमा ५७ रन बनाए। उनले डेब्यू टी–२० मा ब्याटिङको मौका पाएका थिएनन्। यसका साथै उनले अर्को उपलब्धि पनि हासिल गरेका छन्।

उनी पहिलो पारीमै भारतका लागि सर्वाधिक रन बनाउने खेलाडीको दोस्रो स्थानमा उक्लिएका छन्।

उनले इशान किशनलाई पछि पारेका छन्। इशानले पहिलो पारीमा ५६ रन बनाएका थिए।

यस सूचीको पहिलो स्थानमा अजिंक्य रहाने छन्। उनले अन्तर्राष्ट्रिय टी–२० को पहिलो पारीमा ६१ रन बनाएका थिए।