रंगशाला निर्माणका लागि मेची महाकाली अभियानमा धुर्मस-सुन्तली फाउण्डेशन

९ चैत, चितवन । धुर्मस-सुन्तली फाउण्डेशनले चितवनको भरतपुरमा निर्माण भैरहेको गौतमबुद्ध अन्तर्राष्ट्रिय क्रिकेट रंगशाला निर्माणमा आर्थिक सहयोग जुटाउन मेची(महाकाली अभियान शुरु गर्ने भएको छ ।

फाउण्डेशनले निर्माण गरिरहेको रंगशालामा आर्थिक समस्या पर्दै गएपछि अभियान शुरु गर्न लागेको हो । उक्त अभियान चैत्र १० गते पश्चिमको कन्चनपुरबाट शुभारम्भ गर्न लागेको धुर्मस सुन्तली फाउण्डेशनका अध्यक्ष सिताराम कट्टेल धुर्मसले जानकारी दिएका छन् ।

अभियानमा सहभागी हुने टोलीलाई सोमबार विहान रंगशालामा काम गर्ने मजदुरहरुले टीका, मालासहित ४ हजार ४०५ रुपैयाँ सहयोग गरेर बिदाइ गरेका छन् । ‘महाकाली नदी, लुम्बिनी र मेची नदीको माटो ल्याएर रंगशालाको मैदानमा राख्ने योजना रहेको कट्टेलले बताएका छन् ।

उनले हरेक जिल्लामा दुई दिन रहेर रंगशालाका बारेमा जानकारी गराउने तथा अभियानमा जोड्ने प्रयास गरिने पनि बताएका छन् । उक्त टोलीमा कलाकार कट्टेलसहित अर्जुन घिमिरे ‘पाँडे’, सामाजिक अभियन्ता अजुर्न भुसाललगायत रहेका छन् । महाकालीबाट सुरु गर्न लागिएको अभियान कन्चनपुर, कैलाली, बर्दिया, बाँके, दाङ, सुर्खेत, कपिलवस्तु, रुपन्देही, परासी, नवलपुर र चितवनसम्म आउने छ ।