६ वाणिज्य बैंकको ब्याजदर सार्वजनिक, कुनले दिँदैछन् कुन खातामा कति ब्याज ?

३१ चैत, काठमाडौं । छ वाणिज्य बैंकले नयाँ ब्याजदर सार्वजनिक गरेका छन् । बैशाख १ गतेदेखि लागू हुने गरी कुमारी, एनसीसी, प्रभु, हिमालयन, राष्ट्रिय वाणिज्य बैंक र नेपाल बैंकले नयाँ ब्याजदर सार्वजनिक गरेका छन् ।

प्रभु बैंकले बचत खातामा न्यूनतम २ प्रतिशतदेखि अधिकतम ४ प्रतिशतसम्म ब्याजदर कायम गरेको छ । बैंकले मद्दति निक्षेपमा व्याक्तिगत तर्फ न्यूनतम ५.५० प्रतिशतदेखि अधिकतम ७ प्रतिशतसम्म कायम गरेको छ भने संस्थागत तर्फ न्यूनतम ५ प्रतिशतदेखि ७ प्रतिशत कायम गरेको छ ।

बैंकले ५ वर्षे अवधिको फिक्स घर कर्जामा ९.९९ र ५ वर्ष वढि अवधिमा लागि १०.९९ प्रतिशत ब्याजदर कायम गरेको छ । त्यस्तै, ५ वर्षे अटो कर्जामा १०.२४ प्रतिशत ब्याजदर कायम गरेको छ भने पाँच वर्ष माथिको अवधिको  कर्जामा ११.२४ प्रतिशत ब्याजदर तोकेको छ ।

नेपाल बैंकले बचत खातामा न्यूनतम २.५० प्रतिशतदेखि अधिकतम ४ प्रतिशतसम्म ब्याजदर कायम गरेको छ । बैंकले मद्दति निक्षेपमा न्यूनतम ५.५० प्रतिशतदेखि अधिकतम ७ दशमलव १० प्रतिशत कायम गरेको छ । त्यस्तै फिक्स कर्जामा भने न्यूनतम ९.४९ देखि १३.९३ प्रतिशत ब्याज ताकेको छ ।

एनसीसी बैंकले बचत खातामा न्यूनतम २ दशममलव ५० देखि अधिकतम ५ प्रतिशतसम्म ब्याजदर कायम गरेको छ । बैंकले मुद्दती निक्षेपमा भने ६ प्रतिशत देखि ८ प्रतिशतसम्म ब्याजदर कायम गरेको छ । त्यस्तै, बैंकले फिक्स कर्जाको ब्याज भने न्यूनतम ९.५० देखि ११ प्रतिशत तोकेको छ ।

हिमालयन बैंकले साधारण निक्षेपमा न्यूनतक २ देखि ४ प्रतिशतसम्म ब्याजदर कायम गरेको छ । बैंकले मुद्दती निक्षेपमा व्यक्तिगत तर्फ ४ देखि ७ प्रतिशत ब्याजदर कायम गरेको छ । संस्थागत तर्फ ३ देखि ७ दशमलव २५ प्रतिशत ब्याजदर तोकेको छ । त्यस्तै, बैंकले फिक्स कर्जाको ब्याजदर ९ दशमलव ४९ देखि १०.९९ सम्म कायम गरेको छ ।

कुमारी बैंकले साधारण निक्षेप अर्थात बचतमा न्यूनतम २ दशमलव ५३ देखि ४.५३ प्रतिशत ब्याज कायम गरेको छ । बैंकले मुद्दती निक्षेपको ब्याजदर भने वृद्धि गरेको छ। बैंकले मुद्दती निक्षेपको ब्याजदर बढाएको हो ।बैंकले मुद्दती निक्षेपमा न्यूनतम ६.५० देखि ७.२५ प्रतिशत ब्याजदर कायम गरेको छ । त्यस्तै, बैंकले दिने कर्जामा भने १ वर्ष देखि ५ वर्षको लागि १०.५० प्रतिशत ब्याज र ५ वर्ष बढि अवधिको लागि ११ प्रतिशत ब्याज पुर्‍याएको छ।

राष्ट्रिय वाणिज्य बैंकले बचत खातामा न्यूनतम ३ प्रतिशतदेखि अधिकतम ५ प्रतिशतसम्म ब्याजदर कायम गरेको छ । बैंकले मद्दति निक्षेपमा व्याक्तिगत तर्फ न्यूनतम ५ प्रतिशतदेखि अधिकतम ७ दशमलव २५ प्रतिशतसम्म ब्याजदर कायम गरेको छ ।