दुई दशकपछि मध्यपहाडी लोकमार्ग कालोपत्रे हुँदै

१० बैशाख, काठमाडौं । करिब दुई दशकपछि मध्यपहाडी लोकमार्गको बागलुङ बजारबाट घोडाबाँधेसम्मको सडकखण्डमा कामले केही तीव्रता पाएको छ।

लोकमार्गको ट्रयाक खुलेको २४ वर्षपछि बल्ल आएर कालोपत्र हुन लमगेको हो । सडक काम तीव्रता पाएसँगै यहाँका जनता लोकमार्गप्रति केही आशावादी बनेका छन्।

अहिले मध्यपहाडी लोकमार्गको बागलुङ बजारबाट घोडाबाँधेसम्मको २५ किलोमिटर सडकमा कालोपत्र गर्ने तयारी थालिएको मध्यपहाडी पुष्पलाल लोकमार्ग आयोजना कार्यालय पर्वतले जनाएको छ।

लोकमार्ग कार्यालयको ताकेतापछि निर्माण सम्झौता भएको पाँच वर्षपछि उक्त सडक कालोपत्र गर्ने तयारीमा लागेको छ। अहिले बागलुङ बजारको उपल्लाचौरबाट धमाधम बेस बिछ्याउने र ग्रेडिङ गर्ने काम भइरहेको छ।

बागलुङको ‘लाइफलाइन’का रूपमा जोडिएको सडकमध्ये २५ किलोमिटरको बागलुङ सदरमुकाम खण्ड दुई भागमा विभाजन गरेर ठेक्का भएको थियो।

उपल्लाचौरबाट अक्षेते–बिहुँ खण्ड २०७३ माघ १४ गते भारतरसिद्धिसाई जेभीले १३ किलोमिटर र बिहुँ घोडाबाँधे खण्ड २०७२ माघ १० गते एमपीरएससिएफरइसिसी जेभीले १२ किलोमिटर सडक दुई वर्षमा सडक कालोपत्र गर्ने ठेक्का सम्झौता गरिएको थियो।

लोकमार्गको निसीखोला खण्ड जम्मा १७ किलोमिटर सडक कालोपत्र हुन बाँकी छ। सदरमुकामबाट बिहुँसम्मको खण्डमा ठेक्का अवधि गत माघ १२ र बिहुँबाट घोडाबाँधे खण्डको ठेक्का गत माघ ९ गते सकिएसँगै कोरोनाका कारण असार मसान्तसम्म पुर्‍याइएको हो।