आज अन्तर्राष्ट्रिय ९ वटा उडान अवतरण हुँदै, कुन कहाँबाट आउँने ?

२४ बैशाख, काठमाडौं । त्रिभुवन अन्तर्राष्ट्रिय विमानस्थलमा शुक्रबार ९ वटा उडान अवतरण हुने भएका छन् । बिहीबार रातीबाट नेपालमा नियमित अन्तर्राष्ट्रिय हवाई उडान बन्द भएएपनि आज ९ अन्तर्राष्ट्रिय उडान अवतरण हुन  लागेकाे हाे ।  त्यसमध्ये तीन वटा जहाज बिहीबार राति विभिन्न गन्तब्यमा पुगेर काठमाडौं र्फकन लागेका हुन् ।

एउटा जहाज भारतबाट तोकिएको उडानअनुसार आउँदैछ । दुई जहाज भने कार्गो लिएर काठमाडौं आउँदैछन् । विमानस्थलका अनुसार साउदीको दमामबाट हिमालय एयरलाइन्सको जहाज काठमाडौं आएको छ । दोहाबाट नेपाल एयरलाइन्स आएको छ । जापानको नारिताबाट नेपाल एयरलाइन्स आउने तालीका छ । भारतबाट एयर इण्डियाको भने सातामा एक उडान हुने गरि पाएको अनुमति अनुसार नै काठमाडौं आएको हो ।

हङकङबाट क्याथे प्यासिफिकका दुई जहाज कार्गो बोकेर काठमाडौं आउने छन् । हङकङ र दिल्लीबाट आएका यी जहाज आजै फर्कने छन् । हिमालय एयरलाइन्सको जहाज कार्गो लिन आजै चीनको कुनमिङ जानेछ । आन्तरिक उडान भने यसअघि नै बन्द भएपछि आन्तरिकतर्फ भने अहिले हेलिकोप्टरहरुले चार्टर्ड उडान गरिरहेका छन् । बिहीबार मात्र २३ हेलिकोप्टर काठमाडौंबाट बाहिरिएका छन् । १८ हेलिकोप्टर काठमाडौं आएका छन् ।

बिहीबार सेनाले तीन उडान गरेको थियो । नेपाल नागरिक उड्डयन प्राधिकरणका अनुसार उडान बन्द भएपनि चार्टर्ड, मेडिकल इमर्जेन्सी तथा उद्धार उडान नियमित रहने भएका कारण विमानस्थल बन्द हुने छैन ।