बलमिच्याइँ गरी अध्यादेशमार्फत पदपूर्ति गर्न खोज्नु गैरजिम्मेवारीपन : नेपाल

२५ बैशाख, काठमाडौं । नेकपा एमाले वरिष्ठ नेता माधवकुमार नेपालले बलमिच्याइँ गरी अध्यादेशमार्फत संवैधानिक आयोगमा पदपूर्ति गर्न खोज्नु गैरजिम्मेवारीपन भएको बताएका छन् ।  सामाजिक सञ्जालमार्फत नेता नेपालले  ओलीले अध्यादेशबाट संवैधानिक नियुक्ति गर्न खोजेर गैरजिम्मेवारीपन प्रस्तुत गर्दै गएको टिप्पणी गरेका हुन् ।

नेता नेपालले भनेका छन्, ‘कोरोना (कोभिड-१९) भाइरस नियन्त्रण गर्न र जनतालाई आवश्यक स्वास्थ्य सामग्री उपलब्ध गराउन केन्द्रित हुनुको साटो बलमिच्याइँ गरी अध्यादेशमार्फत संवैधानिक आयोगमा पदपूर्ति गर्न खोज्नु गैरजिम्मेवारीपन एवम् अलोकतान्त्रिक कार्य हो।’

त्यसैगरी नेता नेपालले संकटका बेला पनि सरकार, नागरिकप्रतिको दायित्त्वबाट च्यूत भएको आरोप लगाएका छन् । साथै उनले प्रधानमन्त्री ओली गलत बाटोमा अघि बढिरहेको आरोप लगाउँदै त्यो तत्काल बन्द गर्न चेतानवी समेत दिएका छन् ।

‘मुलुकमा उत्पन्न विषम परिस्थितिमा सरकार जनताप्रतिको आफ्नो मुख्य दायित्त्वबाट च्यूत हुन मिल्दैन । अतः गलत बाटोबाट गरिने यस्ता नियुक्तिका प्रयासहरू तत्काल बन्द गर्न र जनताको जीवनरक्षामा ध्यान केन्द्रित गर्न आह्वान गर्छु ।’ नेपालले लेखेका छन् ।

ओलीले आइतबार विहानका लागि संवैधानिक परिषद् बैठक बोलाएका छन् । उक्त बैठकामा प्रमुख प्रतिपक्षी दलका नेता शेरवहादुर देउवा र सभामुख अग्निप्रसाद सापकोटाले उपस्थित नहुने बताइसकेका छन् । लोकसेवा आयोग लगायत केही आयोगमा पदाधिकारी रिक्त रहेका छन् ।