युनाइटेड फाइनान्सलाई प्राप्तिपछि नबिल बैंकले एकीकृत कारोबार आइतबारबाट शुरु गर्ने

काठमाडौं । नबिल बैंकले युनाइटेड फाइनान्सलाई प्राप्ति पश्चात एकीकृत कारोबार असार २७ गतेदेखि शुरु गर्ने भएको छ ।

यी दुबै कम्पनीको असार ५ गते सम्पन्न छुट्टा छुट्टै वार्षिक साधारण सभाबाट प्राप्ति गर्ने प्रस्ताव पारित भएको र गत असार १५ गते नै नेपाल राष्ट्र बैंकबाट अन्तिम स्वीकृती पाइसकेका कारण एकीकृत कारोबार शुरु हुन लागेको हो ।

कम्पनीले गत असार १८ गते कम्पनी रजिष्ट्रार कार्यालयबाट कम्पनी गाभ्ने स्वीकृती पाइसकेको पनि बताएको छ ।

युनाइटेड फाइनान्सको १ कित्ता शेयर बराबर नबिल बैंकले शून्य दशमलव ३५ कित्ता (१:०.३५) शेयर प्रदान गर्ने गरी युनाइटेड फाइनान्सलाई प्राप्ति गरेको हो ।