१० लाख कित्ता ऋणपत्र निष्कासनको अनुमति माग्दै कामना सेवा पुग्यो बोर्डमा

७ साउन, काठमाडौं । कामना सेवा विकास बैंक लिमिटेडले ऋणपत्र निष्कासनको अनुमति माग्दै नियामक निकाय नेपाल धितोपत्र बोर्ड (सेबोन) मा निवेदन पेश गरेको छ ।

बैंकले १ अर्ब रूपैयाँ बराबरको १० लाख कित्ता ऋणपत्र निष्कासन गर्न साउन ३ गते सेबोनमा निवेदन पेश गरेको हो । जसमध्ये बैंकले सर्वसाधारणका लागि ४ लाख कित्ता र व्यक्तिगत रुपमा विभिन्न संघ संस्थालाई ६ लाख कित्ता बिक्री गर्नेछ ।

बैंकले १० वर्ष अवधि भएको वार्षिक ९ प्रतिशत व्याज भएको ‘१० वर्ष, ९ प्रतिशत केएसबीबीएल डिबेञ्चर, २०८८ नाममा ऋणपत्र निष्कासन गर्न लागेको हो ।

त्यसैगरी, बैंकको उक्त ऋणपत्रमा निष्कासन तथा बिक्री प्रबन्धकको काम एनआइबिएल एस क्यापिटल लिमिटेडले गर्नेछ ।

आर्थिक वर्ष २०७७/७८ को अन्तिमसम्म आइपुग्दा बैंकले ७० करोड २ लाख रुपैँया खुद मुनाफा आर्जन गरेको छ । बैंकको चुक्ता पुँजी २ अर्ब ६५ करोड रुपैयाँ र जगेडा कोषमा १ अर्ब २८ करोड रुपैयाँ रहेको छ । कम्पनीको प्रतिसेयर आम्दानी २६ रुपैयाँ ४० पैसा पुगेको छ ।